Parlamentario di AVP, Clifford Heyliger, ta pidi contestanan concreto tocante construccion di cas social, eliminacion di riesgonan di siguridad na e refineria y continuidad di transporte publico. Den su disertacion pa e tratamento di e presupuesto suplementario 2026, Heyliger ta pone enfasis riba e manera cu decisionnan presupuestario mester responde na necesidadnan diario di comunidad.
Pa Heyliger, e discusion presupuestario mester duna claridad tocante e prioridadnan di gobierno, e plazonan pa ehecucion y e resultado cu ciudadano por spera.
Cas social pa diferente generacion
Dirigi na Minister René Herdé, Heyliger ta pidi detaye tocante e plan di FCCA pa construccion di 140 cas social pa personanan di 55 aña pa riba. Alabes, e ta cuestiona si tin plan pa amplia construccion di cas social pa personanan di tur edad y dentro di ki plazo esaki por sosede.
E parlamentario ta pone atencion riba e necesidad di ofrece perspectiva na diferente grupo cu ta busca un vivienda cu nan por paga. E kier claridad tocante con e plan pa 55-plus ta forma parti di un aanpak mas amplio pa atende e necesidad di vivienda social.
Siguridad na tereno di refineria
Heyliger ta recorda cu durante un bishita di Comision di Energia na Refineria di Aruba, e miembronan a haya un recorido riba e tereno. Den e contexto di e bishita, a trece na atencion e necesidad di desmantela un schoorsteen, conoci como un smoke stack, pa motibo di siguridad.
Segun e parlamentario, e riesgo ainda no a wordo elimina. P’esey, e ta pidi Minister Arthur Dowers splica pakico e desmantelacion no a tuma luga y ki medidanan lo wordo tuma pa atende e situacion.
Pa Heyliger, ora identifica un riesgo di siguridad, mester tin claridad tocante ken ta responsabel pa atende esaki y ki tempo e trabou lo wordo ehecuta.
Garantisa Servicio di Arubus
Tocante Arubus, Heyliger ta referi na e reunion di comision cu e bestuur di e compania y na e preocupacionnan tocante su situacion financiero.
E ta pidi Minister Dowers presenta e plan pa garantiza cu Arubus por sigui cumpli cu su rol social. Den e sentido aki, e ta trece dilanti e problemanan cu busnan cu ta daña y e falta di suficiente parada di bus.
E preguntanan ta dirigi riba tanto e sostenibilidad financiero di e compania como e calidad y disponibilidad di e servicio pa e personanan cu ta depende di transporte publico.
Costo di bida y salario minimo
Heyliger ta señala cu gobierno a absorba parti di e subida di prijs di combustibel pa mitiga e impacto riba comunidad. E ta cuestiona e postura di oposicion cu, segun e, a acusa e gabinete AVP/Futuro di no haci suficiente pa atende costo di bida, mientras awor ta cuestiona e intencion pa subi salario minimo den fase te acerca esaki na bestaansminimum.
Pa e parlamentario, e discusion mester mantene e realidad di e trahado central. E presion di costo di bida ta exigi medidanan cu ta yuda famianan cubri nan necesidadnan basico y mehora nan posicion financiero.
Responsabilidad social ta comparti
Heyliger ta observa cu hopi organisacion cu a bishita parlamento durante e ultimo aña a pidi mas recurso pa por sigui funciona. Segun dje, esaki ta refleha e cantidad di necesidad social cu tin den comunidad y e expectativa cu gobierno lo atende nan.
Den e contexto aki, e ta plantea tambe e rol di comercio. E ta pidi si gobierno tin un bista di cuanto e sector comercial ta contribui anualmente na iniciativanan comunitario y social, y cuanto e contribucion ey ta representa como percentahe di nan omzet.
Cu e preguntanan aki, Heyliger ta pone enfasis riba e necesidad di un esfuerzo comparti entre gobierno, comercio y organisacionnan social pa atende e retonan di Aruba y fortalece bienestar di comunidad.
