Den e proceso di formacion di gobierno entre AVP y FUTURO, un punto di desacuerdo ta continua, esta e cantidad di ministernan cu cada partido lo haya. AVP a ofrece FUTURO dos minister den e gabinete, mientras cu FUTURO ta insisti cu nan mester haya tres minister. Esaki ta crea un situacion di tension den e negociacionnan, cu ya ta hopi delicado y crucial pa e futuro di gobernacion di Aruba.
egun informacion publica, AVP ta basando su oferta riba nan posicion di resultado di eleccion reciente, considerando nan cantidad di asiento den Parlamento. FUTURO, di otro banda, ta argumenta cu nan rol den e formacion y nan peso politico actual ta hustifica un cantidad mas grandi di minister. Esaki ta pone un obstaculo pa logra un compromiso entre e dos partido politico.
Lider di FUTURO, Gerlien Croes, a indica anteriormente cu e proceso mester ta basa riba respet mutuo y un dialogo abierto. E desacuerdo aki, sinembargo, ta mustra cu pa logra un balance necesario pa forma un gabinete di coalicion no ta facil. Gerlien a menciona cu e formacion di Gobierno no por bay ken tin mas cu otro, sino mester tin trato igual.
Interno den AVP, e postura di 7 minister ta haci su impacto. Si Futuro persisti pa 3 minister, AVP lo haya 4 minister y esaki ta haci AVP hopi dolor interno, ya cu nan lo no por logra acomoda tur e promesanan di minister.
Internamente, esey tabata e gritonan di desepseracion di “48 ora”, cual a wordo confirma pa Mike Eman cu partidonan ta leuw for di otro. For di seno di AVP, nan tabata asina rabia cu nan a cuminza “blaas” Gerlien Croes riba social media, yamando e pa tur sorto di cos, mustrando atrobe un falta di respect contra nan futuro partner di coalicion. Un consehro di AVP a yama Gerlien pa “The Queen of Sheba”, entre otro.