Parlamentario Shailiny Tromp-Lee:
Ayera, 18 di juli 2022, mi a asisti na un rueda di prensa extraordinario di Minister di Enseñansa y Deporte caminda el a anuncia cu un team di negociado a logra bolter e contracto entre Lotto pa Deporte y Canadian Bank Notes (CBN). Un contracto cu tabatin un validez te cu aña 2035 pero manera Minister Endy Croes a indica cu mediante di negociacionnan duro y fuerte, honesto y den ‘good faith’ a logra fiha condicionnan nobo cu lo keda ancra den un contracto nobo. Dentro di 90 dia un contracto nobo lo bay keda firma entre Lotto y CBN. Un contracto cu sigur lo bay aporta na realisa e vision di Gabinete Wever-Croes, esta cu deporte y deportistanan mester ta central den cualkier proceso.
Un di e condicionnan sigur cu ta impactante ta e hecho cu a logra bolter e contrato bek na e situacion di prome cu aña 2011 unda cu CBN tabata haya unicamente 8,25% di e benta bruto na management fee pa e servicio di tecnologia compara cu e 23.5% cu nan a cuminsa haya desde 2011 te cu awor pa e servicio di tecnologia y e operacion total di Lotto cu e tempo ey a keda pasa completamente pa CBN. Sigur e logro aki ta algo grandi. Algo cu sigur Minister Endy Croes a traha cu hopi determinacion pa ser alcansa. Ami sigur ta aplaudi tur e trabou duro realisa pa tur stakeholders. Ami kier wak inversion den deporte tuma lugar, ami kier wak nos facilidadnan y canchanan deportivo keda restaura y manteni, ami kier wak nos deportistanan keda enberdad poni central.
Nos no mester lubida cu durante 2001-2009 nos por a wak unda e placa di Lotto tabata bay, caminda veldnan a keda drecha, a haya luz, cura, manteni, caminda hopi facilidadnan Deportivo y recreacional a keda construi. Facilidadnan Deportivo manera: CD Frans Figaroa, Parke Curason na Yaburibari, CD Nadi Croes/Crismo Angela, dos veldnan na Pos Chikito, CD na Yara y Simon Antonio. Alabes a cambia e yerbe y drecha CD Guillermo Prospero Trinidad. Pero tin hopi mas. A bira ora pa Lotto bira enberdad pa deporte y nos deportistanan bek.
