Manera cu por a mira riba varios red social, hopi ta e criticanan cu a bin den direccion di gobierno pa loke ta e implementacion di e toque de queda cu lo drenta na vigor dia 30 di december marduga y cu lo dura te cu dia 3 di januari, cu excepcion di dia 31 di december pa dia 1 di januari, cual lo ta for di 2’or di marduga, te cu 5’or di mainta.
Hasta tin memenan traha di e cara di prome minsiter Evelyn Wever-Croes, na momento cu a anuncia e medidanan aki.
Un cos tin cu tene cuenta cu no ta pa pret ta bin cu e medidanan aki, sino e ta un manera di prevencion pa asina por mitiga e plamamento di coronavirus.
Tin cu tene na cuenta cu na momento cu bin aglomeracion, e chens ta hopi grandi cu e virus por propaga mas ainda.
Nos tur sa cu tin e tradicion di cas pa cas, of manera cu e bieunan ta yam’e, ta core Dande. Pero nos mester pensa riba nos bienestar general, di nos yiunan, nos grandinan cu por ta “un” solo persona, por plama e virus peligroso aki.
Cinco motibo pa preocupacion
Durante un conferencia di prensa yama pa Gobierno, prome minister Evelyn Wever-Croes a splica cu durante e ultimo lunanan desde maart cu a cuminsa cu e maneho di e crisis aki, tabata tin momentonan dificil, momentonan menos dificil, y diamars tabata un di e momentonan dificil, pero sigur necesario.
Si mira e cantidad di casonan activo cu tin te cu dialuna, tin 164 caso activo y tin un total di 49 hende cu a fayece, cu tabata tin e virus.
E mandatario a cuminsa na analisa e situacion cu ta aden y despues anuncia e medidanan nobo, splicando dicon a bin cu medidanan nobo.
Tin motibonan pa preocupacion y ta partinan den cinco categoria. E cantidad di casonan nobo pa dia ta aumentando.
Tabata tin un averahe te cu dialuna di 20 caso nobo pa dia. Esaki ta e mesun nivel cu tabata rond di 19 di october.
E ta preocupante, segun e prome mandatario. Si mira e averahenan e luna aki, a habri luna cu un averahe di 18, a tuma cierto medidanan.
El a baha pa 12 e siman siguiente. E di tres siman di december e tabata na 16 y awo na di cuater siman di december e ta na 20.
Pero mas alarmante ta, cu diamars, te asina leu e indicacion ta cu e cantidad di casonan nobo ta rond di 40.
Banda di esaki, ora ta papia di e casonan nobo, tin cu para keto tambe na loke ta yama na e Positivity Rate.
E porcentahe di e cantidad di testnan positivo den relacion cu e total di testnan riba un dia. E positivity Risk dialuna tabata 40%.
Y esaki ta e mesun nivel cu e tabata na augustus, net prome cu e piek na september, cual ta haci’e hopi preocupante tambe.
E di dos motibo pakico ta hopi preocupa pa e desaroyonan, ta e motibo di testmento. A ripara cu hendenan no ta test mas manera antes.
Tin menos test ta wordo haci y locual ta mas preocupante ta cu esnan cu si ta test ta warda 4 pa 5 dia cu nan tin sintoma, pa e ora nan bay test.
E consecuencia di esaki naturalmente ta cu den e cuater pa cinco dia ey, ta plama e virus rond sin cu hende sa di esaki.
Di e personanan cu si ta haci e test, 80% ta resulta cu nan ta haya esaki den cas, esta cerca miembronan di famia.
40% sa unda nan ta haya e contagio aki. E fuente di contagio tambe ta un motibo di preocupacion, ademas cu ta riparando cu nos residentenan ta biahando mas y den varios ocasion ta boble bek cu e virus.
Riba un dia tabata tin 9 residente cu a bolbe di vakantie y a bin cu e virus, di cual 8 for di Merca y 1 for di Hulanda.
E siguiente motibo pakico ta preocupa cu e desaroyo, ta comportacion. Lamentablemente durante di full e pandemia, semper tabata tin un grupo cu no tabata atene nan mes na e reglanan.
Nan tabata laga di desea pa loke ta comportacion. Pero a mira cu e grupo aki den e ultimo simannan, a bira mas grandi.
Specialmente den e ultimo fin di siman caminda cu por a mira varios aglomeracion y fiesta clandestino y a mira con popular e fiestanan clandestino ta birando den e dianan nos dilanti.
E comportacion aki ta preocupante.
Tambe a ripara lamentablemente cu nos musiconan, djnan a bira hopi creativo y cu nan comportacion of actuacion, nan ta causando hopi aglomeracion, cual ta hustamente locual a palabra cu nan, cu no por pasa.
