World Migratory Bird Day (WMBD), Dia Mundial di Parha Migratorio ta un campaña annual pa crea concientizacion tocante e necesidad pa e conservacion di parhanan migratorio y nan habitatnan. E tin un alcanze global y ta un herment efectivo pa eleva e conciencia di e menazanan pa parhanan migratorio, nan importancia ecologico y e necesidad pa cooperacion internacional pa proteha y conserva nan.
Tur aña hende rond mundo ta tuma accion y ta organiza eventonan publico, manera festival di parha, programa di educacion, exposicion y excursion pa bay wak parha pa celebra Dia Mundial di Parha Migratorio.
Tur e actividadnan aki tambe por ser haci cualkier otro parti di aña, ya cu migracion di parha ta experiencia e momentonan culminante den varios pais y region den periodonan diferente, pero e principal dianan pa celebracion internacional ta tuma lugar e di dos diasabra di luna di Mei y Oktober cada aña.
E aña aki e dos dia ta cay riba diasabra 9 mei y diasabra 10 oktober 2026.
PAKICO PARHA MIGRATORIO MESTER DI PROTECCION
Migracion ta envolvi un biahe largo y cu frecuentemente un cantidad di menaza ariba caminda, mayoria causa pa actividadnan di ser humano. Y mes diverso cu e habitatnan y hendenan ta den diferente pais, asina tambe e menazanan cu parha ta enfrenta ta varia. Pasobra parha migratorio ta depende di un cantidad di sitio na caminda den nan area di distribucion biologico, e perdida di lugarnan pa pasa e temporada di winter, of lugar di descanso por tin un impacto dramatico riba e posibilidadnan pa sobrebibencia di e parhanan.
Bula distancianan largo ta envolvi pasa multiple frontera entre paisnan cu diferente maneho ambiental, legislacion y medidanan di conservacion di naturaleza. E ta evidente cu cooperacion internacional entre gobiernonan, NGOs y otro stakeholders ta rekiri a lo largo di e rutanan migratorio pa intercambia conocimento y coordina esfuerzonan pa conservacion. E framework legal y instrumentonan di coordinacion pa e cooperacion aki ta ser proporciona pa acuerdonan multilateral ambiental manera e Convencion riba Conservacion di Especienan Migratorio (CMS) y e Acuerdo riba e Conservacion di Parhanan Acuatico Migratorio di Africa y Eurasia (AEWA).
Dia Mundial di Parha Migratorio a ser inicia na 2006 pa e Secretariado di e Acuerdo riba e Conservacion di Parhanan Acuatico Migratorio di Africa y Eurasia (AEWA) den colaboracion cu e Secretariado di e Convencion riba Conservacion di Especienan Migratorio (CMS).
TEMA PA 2026: TUR PARHA TA CONTA- BO OBSERVACION DI PARHA TIN VALOR!
E tema pa 2026 ta “Every Bird Counts – Your Observations Matter!”, “Tur Parha ta Conta- Bo Observacion di Parha tin Valor!”, destacando e papel importante di ciencia comunitario, mihor conoci como citizen science pa conservacion di parha migratorio.
E campaña ta enfatiza e valor di observacion y monitoreo haci pa persona individual, comunidad y organisacionan mediante observacion graba di sonido, birdwatching, neishi di parha y parha cu ta bishita birdfeeder etc. pa crea data y conocimento cu por ser comparti y contribui na estudio y base di data necesario pa crea maneho structura pa conservacion di biodiversidad, tanto local como regional y internacional.
Conteo di parha (Bird Count), monitoreo di habitat, area residencial y urbano y den cura di cas tur ta esencial y den cual hende, comunidad y organisacion por participa y colabora.
E tema di e aña ta coincidi cu e 60 aniversario di e International Waterbird Census, y ta crea un oportunidad pa monitor y proteha rutanan migratorio di parhanan acuatico manera e bubinan riba e islanan dilanti costa di Seroe Colorado. Observacion di rutanan migratorio ta enfatisa e conectividad, colaboracion y responsabilidad comparti cu nos tur tin den conservacion di biodiversidad.
DIA MUNDIAL DI PARHA MIGRATORIO, SITUACION DI ARUBA
Na e Conferencia COP12 di e Protocol Concerning Specially Protected Areas and Wildlife (SPAW) in the Wider Caribbean Region, teni na Aruba na October 2023 na Aruba, Rainbow Warriors Core Foundation como participante observador a haci un intervencion enfatisando e valor di citizen science y open data pa sostene tomo di decision pa e SPAW Protocol. A propone proyecto piloto usando data satelital y di sensor, alinea cu e Blue Carbon framework pa aumenta monitoreo di mangel y ecosistema en general.
A subraya e necesidad pa integra inteligencia artificial (AI) pa mehora analisis di data y predictive monitoring, cual esfuerzonan lo cuadra cu e Decada di Nacionan Uni di Ciencia Oceanico pa Desaroyo Sostenibel y e Decada pa Restoracion di Ecosistema, locual lo promove uso di ciencia habri, participacion comunitario y conservacion di biodiversidad.
Rainbow Warriors Core Foundation ta participa den 4 community groups dedica na inteligencia artificial cu e obhetivo specifico pa crea standard pa AI pa desaroyo sostenibel. E Community Groups ta parti di e World Wide Web Consortium, un organisacion crea pa e inventor di e World Wide Web, Tim Berners-Lee. E organisacion aki ta crea standards pa uso riba web mediante Working Groups y Community Groups.
Nos ta orguyoso pa anuncia cu lo bay prepara e desaroyo di proyecto cu ta cuadra cu e tema di Dia Mundial di Parha Migratorio 2026.
APLICACION DI CIENCIA COMUNITARIO Y RAPORTAHE EN VIVO.
Nos lo bay evalua uso di tres aplicacion di e Cornell University Lab of Ornithology, esta eBird, un plataforma global na unda “birders” (observador di parha) por somete data en vivo.
Ademas lo investiga con pa adapta e aplicacionan NestWatch y FeederWatch pa uso na Aruba.
Y tambe lo evalua uso di Merlin Bird ID, un aplicacion cu ta usa inteligencia artificial pa identifica parha sea via sonido of foto.
Y lo considera usa BirdNET, cu ta usa AI y monitoreo automatisa acustico pa siña reconoce mas di 6000 especie globalmente. BirdNET ta crea un ecosistema habri pa interconeccion cu proyecto rond mundo pa reconoce canto di parha pa uso residencial y investigacion cientifico. Algun proyecto cu ta utiliza Bird NET ta HaikuBox, birdNET-Pi basa riba Raspberry Pi, BirdWeather, Terra, Chirpity y FaunaNet.
COLABORACION NA NIVEL INTERNACIONAL
ICARUS Birds ta un proyecto Europeo usando satelite pa monitorea movimento y mortalidad di especie comun den tempo real, cu por ser usa pa algun especie di parha tambe na Aruba. E proyecto aki ta encabeza pa e Max Planck Institute for Animal Behavior na Alemania.
Rainbow Warriors Core Foundation lo specificamente bay desaroya digital twins pa conservacion di biodiversidad manera proponi den nos intervencion den e conferencia SPAW COP12.
Den e cuadro aki lo bay enfoca riba colaboracion cu e proyecto Europeo BioDT, cu ta un proyecto basa riba digital twins, modelonan digital simulacro di realidad pa monitoreo di biodiversidad y EuroBirdPortal (LIFE EBP), cual ta combina data di 31 pais europeo pa monitorea den tempo real patronchi espaciotemporal den distribucion di parha. Tin actualmente mas di 20 plataforma en linea na Europa colectando data di observacion di parha na Europa.
Nos lo bay acerca organisacion y instancianan local dedica na conservacion di biodiversidad pa participacion y colaboracion den e proyectonan menciona.
