Riba Dia Mundial di Ranger, Aruba Conservation Foundation (ACF), ta uni su mes na e comunidad global di conservacion pa reconoce e personanan cu ta dedica na proteha, preserva, y restaura Aruba su herencia natural, tur dia.
Ora hende pensa riba ranger, hopi biaha ta imagina un persona cu ta patruya, y maske cu esaki sigur ta parti di e profesion, ta un ranger ta nifica hopi mas cu esey.
Na Aruba rangernan tin e rol esencial di salvaguardia Aruba su sistema ecologico y biodiversidad unico den areanan protegi maneha pa ACF. Di restaura rifnan di coral, mondi di mangel, y yerba di lama, pa proteha e herencia natural y cultural den Parke Nacional Arikok, pero tambe guia bishitantenan den naturalesa responsabelmente, responde na yamadanan di ayudo pa especienan nativo, restaura habitat y educa e futuro generacion. E trabou di un ranger ta extende mas profundo cu tin biaha ta pensa.
Pero conservacion di naturalesa no ta e responsabilidad di rangernan so. Proteha Aruba su naturalesa ta rekeri colaboracion entre organisacionnan di conservacion, autoridad, gobierno, experto, boluntario, comunidad di Aruba, scolnan y cada un persona cu ta dicidi di corda pone naturalesa central den tur decision cu ta wordo tuma. Rangernan por ta para riba e prome liña di conservacion, pero impacto duradero ta posibel solamente door di colaboracion y compromiso comparti pa proteha e lugarnan cu ta haci Aruba unico.
“Awe nos ta reconoce e personanan cu ta scoge tur dia pa proteha Aruba su herencia natural. Nan trabou hopi biaha ta tuma luga tras di e escenanan, pero e impacto ta wordo sinti rond di nos isla. Den nomber di Aruba Conservation Foundation, mi ta manda gradici nos rangernan pa semper para pa naturalesa. E dia akinan ta pertenece na boso,” ta comenta Tyson Lopez, Director General, ACF.
Riba Dia Mundial di Ranger, ACF kier encurasha tur hende pa haci nan parti pa proteha Aruba su naturalesa. Esaki por ta door di haci trabou boluntario, bishita naturalesa den un manera responsabel, apoya iniciativanan di conservacion, of simplemente ta un bos pa naturalesa. Cada accion ta contribui na un futuro mas sosteniblel pa Aruba.
Pa celebra Dia Mundial di Ranger, ACF ta invita comunidad pa descubri e diferente caranan cu ta conserva Aruba su naturalesa.
