Insulto ta un sla of golpi verbal, cu hopi biaha ta sali for di boca di hende, y ta bira manera un piedra tira, cu bo no por alcansa mas.
Insulto ta causa dolor.
Insulto ta descurasha hende.
Insulto ta aumenta rabia.
Insulto ta un provocacion.
Insulto no ta bini di Dios.
Den varios versiculo biblico Efesionan 6:4 y Colosensenan 3:21 , mayornan ta wordo adverti pa no provoca nan yiunan, y esey ta sosode hopi biaha cu insulto of rechaso.
Ora un mayor ta insulta su propio yiu publicamente, e ta habri porta, pa rechaso, y bulying of tentamento of cherche, pasobra ora un mucha su mayor mes ta dune un nomber di insulto, esey ta nifica cu asina e mayor cu a trece na mundo ta mire.
Insulto ta pone cu hopi biaha un mucha ta sera su mes, y no ta papia pa hende por sa kico berdaderamente a pasa cune.
Bo tabata sa cu insulto por stroba un mucha di avansa, of mihor bisa e por stanca su bida, pasobra bo palabra di insulto como mayor a intimida e mucha.
Nada no ta wordo logra cu insulto, pasobra ta posibel coregi sin insulta,no tin mester di rebaha un hende pa demostra sabiduria, ni tampoco cu bo ta mas grandi.
Grandesa ta bini ora nos sa di saca sabiduria for di un momento di dolor, cu expresion di curashi ta lanta esun cu a cay, y mustre cu e por mihor.
Pero ora nos ta insulta, nos ta ofrece falta di respet, falta di amor,y falta di comprendemento, y hopi biaha nos ta lubida, cu nos tambe a pasa den e tempo ey, y con nos a wordo yuda.
Den e historia di e yiu perdi, nos por mira con leu corecion di un tata por yega den amor, demostrando na e yiu, cu e tin mas balor du tur e cosnan cu e perde, cu su bida bal hopi mas, y asina nos ta kibra tur acusacion di diabel, pasobra nos ta wak con pa sana un herida, y no pa demostra nos autoridad como tata.
Si bo yiu a fia bo auto y e a sali y a sosode un accidente, e prome cos cu bo tin cu wak ta bo yiu y despues bo auto, pasobra bo yiu tin mas balor cu bo auto nobo.
Palabra di insulto, a causa hopi danjo, a causa hopi dolor , tristesa, hende ta bandona cas, y hasta violencia. matamento y hasta suicidio..
Ora nos ta papia di displina y coreccion, nos tin di pone insulto un banda, pasobra insulto ta blokia amor y bon comprendemento, y hopi biaha ta kibra amistad entre mayor y yiu.
Ora un mayor ta insulta su yiu constantemente dilanti di hende, especialmente ora un mayor ta usa un yiu su debilidad of fout cada rato pa hala su atencion, e ta aleha e mucha mas for di dje.
Pesey e palabra di Dios para scirbi den Isaias 41:10 ta mustra nos claramente con Dios ta lanta nos bisando: No tene miedo, pasobra Mi ta cu bo,no desmaya pasobra Mi ta bo Dios. Lo mi fortalesebo,si lo Mi yuda bo,si, lo Mi sostene bo cu Mi man drechi di husticia.
Palabra di encurashamento semper ta bon bini segun Efesionan 4:29, pa nos por papia bon cu otro tur momento, y no habri porta pa e enemigo drenta, sino pordona otro, no haci e Spirito Santo di Dios tristo, no laga solo baha riba nos rabia.
Awe ta un bon y tremendo momento pa pidi despensa, y Dios mes lo habri nos curason.
Sinceramente,
Pastor Marcel Balootje
