Den Salmo 139:7-12 ta para scirbi:
Na unda mi por bay for di bo Spirito?
Of na unda mi por huy bay for di bo presencia?
Si mi subi na cielo,Bo ta eynan.
Si mi habri mi cama den Seol mira, eynan tambe bo ta.
Si mi tuma hala di marduga, si mi bay biba den e partinan mas aleha di laman, ayanan tambe bo man lo guiami y bo man drechi lo cohemi tene.
Si mi bisa ; Siguramente scuridad lo tapa mi. Y e lus cu ta rond di mi lo bira nochi,asta e scuridad no ta scur pa bo,y anochi ta mes cla cu di dia.
Scuridad y lus ta mescos pa Bo.
Hebreonan 4:12-13 ta para scirbi: Pasobra e palabra di Dios,ta bibo y activo y mas scerpi cu cualkier spada di dos filo, y ta penetra te na e division di alma y spirito,y di carni y di tuti,y ta capas di husga e pensamentonan y intencion di curason.
No tin nngun criatura, scondi pa Su bista,ma tur cos ta habri y bisto dilanti di wowo, di Esun cu nos tin di haber cune.
Rey David tabata haci su mes liber den bista di hende, mientras cu den bista di Dios e ta culpabel.
Awendia e diabel ta ganja hopi hende, pa nan biba den pica, y rabia ora nan wordo bisa cu e bida cu nan ta biba ta contra, naturalesa y boluntad di Dios, y nan ta bisa cu ta nan bida priva, y nan no sa cu dilanti di Dios ningun hende tin bida.
Ta algo masha doloroso ora hende keda para riba nan capricho, cu duresa di curason y no kier reconoce cu nan ta robes, cu nan ta fout bezig, pero ta sigi pretende, y sigi ganja nan mes y otronan, y asina permanece den scuridad.
Den 1 Juan 1:9 palabra di Dios ta bisa lo siguiente: Si nos confesa nos pica, E ta fiel y husto di pordona nos, nos picanan y libra nos di tur inhusticia.
Mientras cu un hende no arepenti di curason,confesa y pidi pordon na Dios, su bida y su consenshi ta keda habri pa acusacion di diabel, pasobra e desconfiansa ta keda reina, pero un bon confesion na Dios, y un bon reconocimento dilanti di hende ta kibra tur plan di diabel, y ta lanta hende bek riba pia.
Kico ta pasa cu hende? Hende ta prefera pleita y bringa y no papia berdad.
Hende ta prefera di divorcia, perde matrimonio y famia, perde cas y no pidi despensa of confesa pica.
Hende ta prefera ganja pa mantene nan posicion, mientras cu nan salud ta bay atras.
Hende ta prefera perde trabao pa orguyo, y no reconoce cu nan ta robes.
Lucas 12:2 ta para scirbi : No tin nada scondi cu lo no wordo revela, y nada scondi cu hende lo no hanja sa.
Un hende por sconde den lugarnan secreto , asina cu Mi no por mir’e, Senjor ta declara, No ta Ami ta yena cielo y tera, Senjor ta declara. ( Jeremias 23:24).
Comcomber na boca di mucha ta hende grandi a pone, tur momento cu nos mira actuacion di un hoben, prome cos cu bini na nos mente ta , con su mayor a educa e hoben na cas, pasobra e ehempel ricibi na cas ta locual e ta desmostra.
Si cas ta bon y tin orden, moral, disiplina, y coreccion, e fruta cu e mucha ta demostra, ta amor , respet, integridad y decencia.
Corda bon cu dilanti di Dios,tin claridad.
Sinceramente, Pastor Marcel Balootje
