Parlamentario Endy Croes a defende firmemente e “track record” impecabel di Aruba durante e ultimo 40 añanan desde e introduccion di e Status Aparte. E Parlamentario a recorda cu Aruba semper a demostra madures y responsabilidad den su maneho financiero, specialmente pa cu prestamonan efectua riba e mercado internacional, entre otro na New York. Durante e cuater decadanan aki, Aruba semper a paga tur su debedonan structuralmente, conforme e reglanan y fechanan di vencemento, sin a cay nunca den un situacion di “default”. Segun Croes, e trayectoria di cumplimento aki mester duna Hulanda e confiansa necesario, cual ta e prueba y garantia cu Aruba lo cumpli cu e prestamo di COVID-19 sin peca y sin faya ningun pago.”
E Mega Debe di AVP (2010-2017)
Croes a subraya cu e realidad financiero actual mester wordo mira den cuadro di e historia reciente. El a enfatisa cu nos NO mester lubida cu AVP a presta e suma astronomico di 2200 miyon florin durante añanan 2010-2017, unicamente pa por a sera nan deficitnan di presupuesto di cada aña. E maneho aki, conoci como “feestvierend ten ondergaan”, a crea e Mega Debe nacional, pushando nos debe for di 43% na 2009 pa un 93% na 2017. Esaki ta e realidad y nos tur sa e historia di Mike Eman, esta e welga di hamber, ora Hulanda tabata kier a pusha e Rijkswet na 2014 den stoma di e gobierno di AVP e tempo ey.
Di COVID-19 pa e Standardnan di IMF
Despues di COVID-19, por tuma nota di un maneho financiero mas solido caminda e cifranan oficial ta papia pa nan mes. Esaki ta ilustra un reduccion structural di nos debe nacional, cual te hasta ta surpasa e pronosticonan di expertonan rumbo pa cumpli cu e conseho di Fondo Monetario Internacional (IMF):
- Aña di COVID-19: E debe nacional a alcansa su punto mas halto den historia, yegando na 112% di GDP, debi cu a presta 916 miyon florin for di Hulanda pa por a sobrebibi e pandemia.
- Aña 2025: A logra un reduccion exitoso di e debe nacional bou 70%.
- Aña 2026: E debe di Aruba ta yegando na 61%.
E rapportnan financiero ta indica cu Aruba su debe nacional lo sigui baha cu e structura cu Gabinete Wever-Croes II a implementa desde 2022 despues di Covid y lo alcansa 47% na aña 2029, locual ta safe y bou di e standard di 50% recomenda pa IMF den su rapport di maart 2025.
Elogio di CAft
E resultadonan aki ta demostra cu Aruba mes por y cu nos pais ta den e bon direccion. No tin ningun rason pa Hulanda pensa cu Aruba lo faya. E realidad aki a keda confirma den luna di februari di e aña aki (2026), caminda e propio Presidente di CAft a declara den Parlamento di Aruba cu e recuperacion financiero ta parse “too good to be true”. E elogio aki a bini net e momento cu el a repasa e detayenan financiero y a destaca e gran logro di e 500 miyon florin na surplus cu a keda atras na december 2024.
Conclusion
Parlamentario Croes a termina bisando cu ta boluntad politico Hulanda tin mester pa nos logra un otro acuerdo cu no ta HOFA, pero cu lo brinda mesun resultado. Manera un onderlinge regeling (areglo mutuo) of un revision y modificacion di e LAFT actual. Di e forma aki, por garantisa e cumplimento financiero y trece trankilidad bek na ambos banda di e oceano Atlantico.
