Conciudadanonan,
Ricibi un saludo cordial y danki pa permiti mi comparti e mensahe aki cu bo y bo famia awe nochi. Aruba ta riba un rumbo firme di recuperacion y progreso. Y ta importante pa comparti informacionnan mas actual.
Nos finansas publico ta riba e rumbo di finansas responsabel y saludable awor, despues cu e añanan tras di lomba nos mester a traha hopi duro pa logra esaki.
Debe di pais Aruba
Dia nos a drenta den gobierno na 2017, nos debe tabata al rededor di 90% di e GDP. Nos a logra baha esaki den apenas dos aña na 78%. Sinembargo debi na e pandemia, nos mester a presta placa pa por a sobrevivi, y e debe a bay te na 124% di GDP. Nos a saca e pais di e pandemia, nos a stabilisa e pais, y nos a crea espacio financiero, y asina nos a logra baha e debe te na 71% di GDP pa fin di e aña aki.
Un parti substancial di e debe aki, ta e debe cu nos tin na Hulanda pa e placa cu nan a presta nos durante di pandemia, 916 miyon florin. Na april ultimo nos a yega na un acuerdo cu Hulanda, den cual nan a baha e interes di 6.9% pa 5.1%, y nos ta na mesa pa logra baha e interes te na 3.4%. E palabracion ta cu na mei 2025 e negosacionnan mester resulta den un ley pa logra e interes abou aki di 3,4%, y e ora Hulanda ta dispuesto pa refinancia e debe biew di Aruba tambe na 3,4%. Esaki lo trece hopi beneficio cu ne, y hopi mas espacio financiero.
Nos no ta ainda caminda cu nos mester ta, pero nos ta riba e bon caminda. Y e resultado aki no a bin dimes. El a bin danki na e vision, determinacion y curashi di nos gobierno hunto cu henter nos pueblo.
Economia
Nos economia a recupera impresionantemente, danki na e crecemento di turismo, y ta premira cu e lo sigui crece e añanan nos dilanti.
Danki na crecemento di nos economia, desempleo ta na e punto mas abou den mas di 20 aña. Tin trabou pa tur hende cu kier y por traha, y hasta tin un scarsedad riba mercado laboral.
Danki na tur esaki, pais Aruba a logra crea un espacio financiero, pa por duna alivio caminda tin mester, pa por haci e inversionnan necesario, y sin neglisha e fundeshi financiero, cu e obligacion di sigui paga debe bek.
Espacio financiero
Cu e espacio financiero, a cuminsa duna bek na pensionadonan, door di e aumento di pensioen di biehes y e aumento di reparatie toeslag 4 biaha caba den e ultimo 7 añanan. Y awe mi ta anuncia cu entrante 1 di januari 2025, e pensioen di biehes ta bolbe subi cu 2.4%. Pensionadonan lo cobra esaki fin di otro luna caba. Den total e pensioen cu nos grandinan ta ricibi a subi cu mas di 400 florin den e ultimo 7 añanan. Esaki lo sigui subi den e añanan nos dilanti, na forma responsabel.
Danki na e espacio financiero nos por a cumpli tambe cu nos empleadonan publico, dunando nan un indexacion di 11.7% despues di 8 aña cu nan no a haya indexacion. 6% a wordo paga caba na juli, y 5.7% lo wordo paga na januari otro aña.
Danki na e espacio financiero nos a aumenta e asistencia social na personanan cu no por traha, e asina yama gehandicaptenuitkering, cu 130 florin pa luna, y lo sigui aumenta esaki den e añanan nos dilanti, na forma responsabel.
E espacio financiero a permiti nos pa porfin por haci inversionnan necesario na Aruba, por ehempel den enseñansa, cu Scol Aloysius na Noord completamente renoba, y proyeccion pa un Julianaschool MAVO nobo na Paradera.
Tambe inversionnan den nos infrastructura, por ehempel den retonde na Palm Beach, e caminda dilanti High Rise hotels, e caminda di Tanki Flip pa Kibaima, y varios otro caminda den nos barionan.
E espacio financiero a permiti nos inverti mas den cuido di salud tambe, a converti IMSAN den un hospital cu 20 cama, a amplia e servicionan cu radiotherapia, y awor ta preparando pa inversion den un petscan.
E espacio financiero a permiti nos tambe inverti den husticia, den mas ekipo moderno y mas personal pa asina por tene Aruba sigur. Y e resultadonan ta bisto, segun varios fuente, Aruba ta e pais mas safe, mas sigur den nos region, y turistanan ta indica cu esey ta un di e motibonan cu nan ta sigui bishita Aruba.
Tur esaki tabata posibel, danki na e vision y determinacion di nos gobierno, pero mas aun, danki na e trabou y dedicacion di tur esnan cu ta traha den e departamentonan di gobierno, y na e aporte di nos sector priva den yuda hiba nos pais padilanti.
Eleccion 2024
Awor cu nos ta dilanti un otro fin di aña, ta un bon momento pa nos para keto y mira atras kico tur nos a realisa. Con duro nos tur a traha cu awor, apenas dos aña despues cu nos a sali di e pandemia, nos pais ta para firmemente riba su pianan.
Otro siman diabierna dia 6 di december nos pais ta bayendo urnanan electoral, pa scoge nos parlamentarionan nobo, y asina haya un gobierno nobo pa e periodo di 2025 pa 2028.
Ta importante pa enfatisa cu den e añanan nos dilanti, pais Aruba mester sigui mantene su mes na e disciplina financiero, pasobra sin finansas, bo no por haci mucho.
Promesanan falso
Nos ta scuhando varios promesanan di elimina un cantidad di impuesto, y di otro banda aumenta un cantidad di entrada, cu no ta realistico, y si nan wordo ehecuta manera nan ta wordo bisa, mas bien ta compromete Aruba cu debenan nobo y presion financiero nobo. Nos mester tene cuenta cu esaki por aumenta inflacion na Aruba y perhudica e stabilidad financiero cu nos ta logrando.
Gobernacion ta algo serio, Aruba ta saliendo for di dos crisis cu a devasta nos pais financieramente durante ultimo añanan, esun prome ta di e crisis financierio cu nos a hereda di e gobierno prome cu nos na 2017, cu a resulta den un KB di Hulanda. Aki rato lo mi splica mas di e contenido di e KB cu ex prome minister Mike Eman a haya pa su mal gobernacion.
Despues a sigui e Crisis di Pandemia cu a causa un crisis di Salud y uno Financiero Economico pareu. Ta awor apensas nos a cuminsa paga.
Awe Aruba ta riba caminda di progreso y recuperacion, pero nos pais ainda ta VULNERABEL.
Aruba tin un debe di mas di 5 biyon florin ainda cual tur aña nos mester paga y riba dje, pagando mas di 300 miyon na interes. Ta cu un maneho responsabel, prudente y strategico nos ta pagando riba e debe, invertiendo den prioridadnan urgente y dunando bek loke nos por na comunidad, pues den un forma responsabel.
Claro cu nos Gobierno ta desea di por a haci mas, Sinembargo “Bo no por fia pa bo duna”, pasobra esey ta bay contra normanan financiero, y pasobra despues loke bo a duna bo tin cu paga bek y cu interes.
Esey no ta sostenibel, bo lo agota bo recursonan y BBO lo tin cu subi hopi; esaki lo significa cu costo di bida y inflacion tambe lo subi.
P’esey mi ta ripiti, Gobernacion ta algo serio, no ta cuestion di purba score “BULANDO CU HALA DI MANTECA. Pasobra bo ta causa bo mes y e pueblo di Aruba daño.
Tin ehempel suficiente di paisnan Europeo y di sur America cu a bay haci esaki y nan fondonan entre otro di pensioen a kibra y a perhudica henter e pais.
Kico Gabinete Wever-Croes a y ta haciendo
Loke si nos Gobernacion a haci y ta haciendo ta mehora e capacidad financiero di Aruba pa por inverti y pa duna alivio, pa mehora e calidad di bida di nos ciudadanonan den forma directo y indirecto manera mi a menciona un rato pasa.
Pa por combati costo halto di bida, tarifa di coriente a wordo baha entrante 1 di november, e luna aki, cu 4.2%, despues cu aña pasa na mei ela wordo baha cu 7.1% tambe.
Pa nos sigui tene inflacion abao y hasta bah’e mas, nos ta papiando cu gremio comercial pa pais Aruba inverti den un propio Linea di Barco di Carga pa trece carga specialmente di Colombia pa Aruba. Esaki lo haci cu e costo di carga pa productonan alimenticio y otro productonan ta bira considerablemente mas barata for di Colombia. Actualmente e carga di Colombia, tin cu bay te Miami Florida pa despues bin Aruba, cual ta hacie mas caro.
Si nos logra tin nos propio linea barco di carga mediano, nos por trece carga di Colombia mucho mas economico.
Ademas, nos ta den e fase final di negosacion cu Colombia pa por importa carni, galiña y carni di porco for di Colombia, cu lo ta na prijs hopi mas abou. Durante e bishita di e embahadora di Colombia pa Reino, nan tambe a mustra cu pa nan esaki ta un prioridad halto.
Den e añanan tras di lomba nos a amplia e canasta basico dos biaha, y den e tempo nos dilanti lo amplia esaki cu cuminda saludable. Riba e productonan den canasta basico gobierno ta eherce control tur luna den tur supermercado
Esakinan ta trabaonan andando cu nos Gobierno ta haciendo pa haci di Aruba un comunidad cu mas recurso propio, cu mas posibilidad, mas resiliente. Pa asina nos mehora e CALIDAD DI BIDA di cada ciudadano, famia y nos bishitantenan.
Fiamento/gastamento di placa
Nos no kier cay den e circulo vicioso di fiamento y gasta loke Aruba no tin. Nos defintivamente no kier BULA CU HALA DI MANTECA. Pasobra nos sa kico ta pasa si nos haci esey Nos a wak e pasa den e gobernacion prome cu nos di añanan 2009-2017. mal maneho financiero, corupcion na gran escala cu tereno y permisonan, pa personanan cu a financia nan campaña. Nan no tabata presta atencion con nan ta manehando Aruba. Y tur esaki a conduci na e Koninklijk Besluit, e decreto real cu Rey Willem Alexander a pone riba Aruba na aña 2014. Den e KB aki ta menciona cu e maneho financiero di e tempo ey tabata malo, cu Aruba tabata gasta mucho mas placa di loke e tabata tin, y cu esey ta trece consecuencianan hopi negativo pa Aruba. Y nos a sinti e consecuencianan ey.
P’esey mi ta ripiti, conciudadanonan, nos no por bay bek pa e pasado ey. Pasobra nos a pasa aden algun anna pasa. E miho dianan di Aruba ta nos dilanti.
Aruba awe
Awe Aruba ta wordo reconoci como un ehempel di recuperacion, cu un turismo solido, criminalidad bao di control, inversion substancial den nos sectornan social pa mehora calidad di bida di esnan den mas necesidad. Stadionnan y otro centronan di deporte renoba, inversion den educacion y awor mas y mas tambe den infrastructura.
Awor pues ta momento pa sigui cu e strategia y structura di nos maneho financiero cu ya ta cosechando su prome frutanan. Continuando cu e maneho aki nos lo tin mas cosecha cu mas fruta den futuro. Segun IMF si nos sigui cu e maneho actual, otro aña inflacion lo baha di actual average 2.3 % pa 1.8% pa 2025, cual ta miho ainda. Y si nos keda cla cu Aruba su propio linea di barco di carga, e lo por baha mas ainda.
Pero si nos cay den e wega di promesanan irealistico di e otronan, inflacion lo tin cu subi, costo di bida lo tin cu subi, pasobra debe di Aruba lo bolbe subi.
Nos ta pidi boso sosten
Apreciabel Conciudadanonan, dia 6 di December boso cada un tin e oportunidad pa vota pa e partido cu segun bo opion y pensamento liber, por traha pa Aruba por sigui progresa na caminda di prosperidad y felicidad. Pa nos tin un pais caminda bo por bay drumi trankil y lanta mainta sabiendo cu e finansas di bo pais, y bo entrada, bo pensioen ta den bon man, debidamente protehi y cu nos hobennan por conta cu e miho educacion y mas oportunidad pa realisa nan soñonan.
Danki pa bo atencion y cu Dios bendiciona nos dushi pais Aruba
