WILLEMSTAD – Djego Real, huntu ku Izaline Calister, ke motiva e diaspora antiano biba riba nos islanan i na Hulanda, pa saka man i yuda su prohimo, den un momentu di Yelele! E kantika infeksioso ta papia di e alegria i satisfakshon ku trabou boluntario por dunabo. Ku Yelele, e proyekto ‘Samen Ouder Worden’ ke korda nos ku nos bario mester di nos, i ke motiva bo pa kaptura bo momento di akshon – aptamente yama e momentu Yelele.
Yelele a keda produsi i skibi pa Riëndy ‘Ray Bass aka Djego Real’ Holder i Izaline Calister, i e videoclip a keda dirigí pa Pathos Studios.


Samen Ouder Worden

Bira grandi ta un privilegio ku nos tur lo ke eksperensia. Lamentabelmente, hopi di nos grandinan ta kaiendo den isolashon paso nan no tin akseso na e rekursonan sosial disponibel. E grandinan aki ta sufri den silensio, espesialmente esnan biba na Hulanda. Pesei fundashon NOV – Nederlandse Organisaties Vrijwilligerswerk – a tuma e inisiativa pa promove e konekshon entre generashonnan pa medio di trabou boluntario unda e nesesidat di e grandi ta para sentral. E inisiativa di NOV a formalisa den e proyekto ‘Samen Ouder Worden’, i ta aktivo na kuarenta luga na Hulanda huntu ku su 11 partnernan strategiko. Den Haag ta keda guia pa kurasoleño Shari van den Hout ku e enfoke riba nos grandinan antiano i karibense.


E momentu ‘Yelele’
E reto ta pa determina kon pa motiva e hoben antiano pa hasi trabou boluntario i pa motiva e grandi pa komparti su sabiduria i konosementu ku e generashon benidero. Ku e kantika ‘Yelele’ e gritu pa akshon a keda publika ku un kampaña ku ta aktivo entre 15 pa 30 di november. Djego i Izaline ke motiva nos komunidat pa kaptura nan propio momentu “Yelele’, pero mirando e restrinshon di COVID -19, nos mester kuida espesialmente nos grandinan i pesei ta opta pa hasi un gritu di akshon mas modera. P’esei nan ta invita un i tur pa usa nan telefon i graba 1 minüt di e miho intrepretashon di e kantika ‘Yelele’ i ‘tag’ e Facebook/YeleleNederland i pone e ‘hashtag #Yelele i #Yelelemoment. Lo skohe e miho intrepretashon di “Yelele’, unda lo saka dos ganado ku por gana varios premio atraktivo. Tur clip lo keda komparti riba e paginanan di Yelele riba Facebook i Instagram. Lo saka e ganado durante e prome siman di desember.


Aktiva den bo bario
Si bo ke informashon kon pa ehekuta trabou boluntario den bo bario, bishita e wepsait di www.samenouderworden.nl pa mas informashon i manda un whatsapp pa e tim di Den Haag –Yurani i Shari – na +31-619788541. Sigui Ray Bass na
www.instagram.com/mrraybass i Djego: www.instagram.com/djegotami Por sigui Izaline Calister riba su instagram.com/izalinecalisterofficial.

LEAVE A REPLY

Please enter your comment!
Please enter your name here