Diaranson ultimo a wordo lansa e proyecto Downtown Reinventa inicia pa Impact Hub Aruba, conhuntamente cu diferente propetarionan den e area di Weststraat cu ta comparti un solo meta, pa duna bida bek den e area di Downtown Oranjestad. Sra. Mary-Ann Falconi-Rasmijn, General Manager di Impact Hub Aruba a splica cu Impact Hub, como un organisacion incubator y coworking space, ta kere firmemente den proyectonan cu ta na beniestar di e comunidad empresarial, cu ta promove desaroyo economico pero mas ainda cu ta beneficia nos comunidad local. Recientemente, a logra forma un comishon di propetarionan di edificionan den Weststraat, pa asina reinverti den nan propiedad, y brinda un experencia nobo cu ta atrae comercio y vivienda bek den e area.

Pa cu e prome evento di e proyecto “Downtown Reinventa”, e comishon ta lansa “Downtown Food & Art Festival”, riba 30 di november, unda cu comunidad por bin disfruta di exposicionnan di arte, arte mural, for di 3or di atardi. For di 6.00 P.M. te cu 11.00 P.M. lo bay tin benta di artesania, pop up stores, cushinanan local como tambe food trucks. Lo bay tin entretenimiento pa mucha door di Disney Recreation. Tambe lo tin entretenimiento musical di DJ Calero, Rumba Caribeña Gaita y Show, y Grupo di Betico. Pa exactamente 8.50 p.m. lo bay tin un show di vuurwerk pa celebra e comienso di un era nobo pa Downtown Oranjestad. 

Sra. Falconi-Rasmijn ta añadi cu e comishon ta conciente cu e proyecto aki ta di un termino largo, y lo bay exigi dedicacion, consistencia pa logra e vision comun, como tambe e compromiso di tur esnan envolvi pa continua cu e colaboracion. Downtown Oranjestad ta consisti di hopi mas area, cu solamente Weststraat y Schoenerhaven, cada un area cu nan propio identidad. Sinembargo e comishon ta tuma e area di Schoenerhaven, Weststraat y Werfstraat como e area pa inicia cu e proyecto piloto. E intencion primordial ta pa otro propetarionan di otro areanan di Oranjestad por sigui cu e framework y aplica esaki pa mas area wordo reinventa. Sra. Falconi-Rasmijn a gradici tur stakeholders, partners y specialmente comerciantenan di e area: Sr. Richard Eman, Sr. Alberto Perret, Sr. Milton Harms, Sr. Irwin Perret, Sr. Jaime Gomez, Sr. Dinesh Mahtani, Sr. Krish Mahtani, Sr. Jean Carlos Espinal, Sr. Demis Illes, Sr. Paul Gielen, Sr. Teddy Bouroncle, Sr, Mark Benson Denz y Sr. Richard Lacle y tur persona cu ta contribui di un of otro manera. Tambe ta gradici patrosinadornan: Aruba Tourism Authority, Harbourwalk, Elite Productions, Romar Trading, PANA, Aruba Ports Authority, Sherwin Williams, Disney Recreation y Eventions 

Sra. Ronella Croes, CEO di Aruba Tourism Authority, tambe tabata presente na e conferencia di Prensa, como un di a partnernan principal, y a amplia encuanto A.T.A. su vision pa cu e experencia cu ta brinda pa e turista di crucero cu ta en busca di un experencia autentico combina cu cultura, historia y nos hendenan. E proyecto aki di cual ta enfoca hustamente den e area di crucero a haci’e mas atractivo pa asina yuda crea e balor agrega pa e turista di crucero. Sra Croes a amplia riba eventonan similar cu a wordo organisa den pasado encabesa pa A.T.A. cu a genera un experencia unico pa Oranjestad y di cual ta spera cu Downtown Food & Art Festival logra e mesun resultado.

E curador di Downtown Food & Art Festival, ta Sr. Ricado “Cado” De Lannoy, kende tin e encargo di investiga e historia di Paardenbaai y Playa, como tambe lidera e aspecto artistico di e proyecto y e conceptonan di cada creacion mural, manteniendo e esencia di e historia y cultura di e area.

Presidente di Associacion Welcome Plaza, Sra. Elizabeth Guanipa, a hiba palabra y a comparti nan experencia como propetarionan di e kioskonan di Welcome Plaza y ambicionnan pa atrae e consumidor local. Tambe Sra. Guanipa a splica nan deseonan di por ricibi e fluho di turista di area di High rise pa bin un poco mas cerca di Oranjestad pa asina conoce e bunitesa cu Oranjestad den su totalidad tin pa ofrece. Oranjestad ta brinda e bishitante e experencia autentico culinario, artesanal y museonan. Sra. Guanipa ta contento di por forma parti di e iniciativa aki y den transcurso di otro siman lo desvela mas di nan participacion.

Por ultimo Sra. Falconi-Rasmijn a haci un invitaction na comunidad di Aruba pa sera conoci cu un Weststraat nobo, riba 30 di November, den ambiente familiar, y goza di nos agrupacionnan local y tambe di un bunita show di vuurwerk.

LEAVE A REPLY

Please enter your comment!
Please enter your name here