Ta bon pa nos tur recorda cu e palabra “Incurabel” no ta mas grandi cu e poder di Dios, pasobra esey ta palabra di hende of caminda ciencia medico no ta mira un salida pa un malesa nan ta declara cu esey ta incurabel, pero locual ta “Incurabel” pa hende, nos Dios tin tur poder pa sana.

Nos no mester tin miedo di papia ora nos tin Fe den Dios pasobra no tin nada cu ta imposibel pa Dios.

Salmo 107:19+20 ta para scirbi: E ora ey nan a sclama na Señor den nan angustia y E a salbanan for di nan aflikshonnan.

E a manda Su palabra y a cura nan,y a libra nan for di nan destruccion nan.

Jeremias 32:27 ta para scirbi: Mira Ami ta Señor e Dios di tur carni acaso tin algo cu ta mucho dificil pa Mi.

Hesus a cura tur tipo di malesa cu hende por a bini cune Su dilanti y nunca Hesus a bisa esaki si ta incurabel, alcontrario Hesus ta nos sanador.

E muher cu problema di fluho di sanger pa 12 anja , a tende, a kere, a mishi cu e zom di bisti, y inmediatamente e bashamento di sanger a stop.Hesus a bise bo fe a sana bo ( salba bo).( Marco 5:25-31.

Bartimeo un homber ciego a tende di Hesus, a yama riba e nomber di Hesus, Hesus a scuche y a manda yame y e a wordo sana ( Marco 10:46-52).

Hairo su yiu tabata malo muriendo, e a bay serca Hesus pidi Hesus pa bay su cas y Hesus a bay cas di Hairo y a sana su yiu.( Marco 5:21-43)

E leproso a yega dilanti di Hesus y a buig y bisa Señor si bo kier bo por hacimi bira limpi, y Hesus a rek su man y mishi cu e homber bisando Mi kier, Sea limpi, y mesora e a keda limpi di su lepra.(Mateo 8:3).

Isaias capitulo 53:4+5 ta bisa: Siguramente E mes a carga nos enfermedadnan y E a carga nos tristesa, toch nos mes a consider’E golpia suta pa Dios y afligi.

Ma e a wordo trapasa pa nos trangreshonnan, E a wordo golpia pa nos inikidadnan, e castigo cu a trece pas pa nos tabata riba dj’E y pa medio di su heridanan nos ta cura.

Pa medio di e splicacion aki nos mester compronde cu Cristo Hesus a tuma nos carganan, y nos enfermedadnan riba dje y si nos kere den dj’E nos lo ta sana.

Den Juan 11:40 Hesus a bisa Marta : Mi no a bisa bo cu si bo kere lo bo mira e Gloria di Dios.

Esey Hesus a bisa prome cu e a lanta Lazaro for di morto, pa demostra e soberania di Dios den tur cos.

Hopi hende ta malo y ta pasando momentonan dificil, pero nos tey pa encurasha tur hende cu ta malo pasando den momento dificil, pa nan corda cu Dios hamas ta laga e husto desampara.

Den e palabra di Dios tin sanacion, tin liberacion, tin gracia y tin fabor di Dios, tin tur locual cu nos mester, hende mester kere y acepta den nan curason cu pa Dios nada ta imposibel.

Mescos cu Hesus por a sana hopi enfermo E por sana abo tambe pasobra pa Dios no tin dinstincion di persona, y tur cos ta posibel pa esun cu ta kere.

Si bo tende e palabra di Dios y kere den Dios lo bo wordo sana.

Sinceramente, Pastor Marcel Balootje.

LEAVE A REPLY

Please enter your comment!
Please enter your name here