E fundacion Ducapro, sin ningun miembro conoci te cu awor, pero solamente y unicamente David Kock kier haci un cobransa na radio emisoranan local, cu ta exhorbitantemente halto.
No solamente cu e ta exhorbitantemente halto, pero ne forma cu nan kier haci e cobransa, tambe ta cuestionabel.
Ta trata di un porcentage te cu 12% di omzet di e radio emisora y mas peor ta cu nan kier tur autoridad pa habri buki di tur radio emisora pa nan coba aden, cuanto ves cu nan desea.
Pues, no solamente nan kier cobra, pero nan kier actua como polis y controlador tambe.
Na ningun pais na mundo por a topa cu e fenomeno aki. Den otro paisnan, ta paga un fee hopi abao. Parce na Aruba, radio emisoranan lo mester paga 20 x mas hopi, compara cu un radio di mes size lo paga den un comunidad chikito na Hulanda. Esaki sigur ta un agresion basta serio riba radio emisoranan local.
No solamente na Aruba, pero Ducapro lo sigui tambe na Curacao y Bonaire, pero tambe lo sigui contra tur restaurant, hotel, tienda, boutique, supermercado y tur parti cu ta toca musica.
Na final esaki ta un big business pa esnan cu ta tras di e cobro aki. Mas cu claro nan mester paga tambe un agencia di monitor local, cu lo saca un report tur fin di luna, cuanto air-play e cancionnan a haya y pa asina nan por distribui 1 cent pa cada autor. E resto cu nan cobra, ta keda den nan saco. Claro cu e fundacion no tin ganashi, pero e mester paga si salario di e director, huurmento di edificio somewhere y mester paga tambe e compania cu ta monitor airplay.
Ainda por corda cu e promer carta cu Ducapro a manda pa radio emisoranan, tabata di un suma di 3000 florin pa luna. Pues, ta obvio cu Ducapro su intencion no ta pa salvaguardia e derecho di autor, pero ta mustra mas bien cu e miembronan spirito y Abogado David Kock simplemente a busca un forumula pa yena nan saco cu placa.
