Si nos kier mira un cambio den comportacion di nos hubentud, anto nos como hende grandi, mester duna bon ehempel.
Pasobra ta riba ken e muchanan cu ta lanta awor tin cu wak, y serca ken nan por tuma conseho, si nos como hende grandi no para keto un rato y realisa na unda e situacion aki ta bay.
Si hende grandi sigi den mesun tradicion, y orguyo,
Di bebe, droga, corre auto burachi,cana cu arma,bende droga, abusa di mucha, violencia domestico, violencia relacional.
Sigi ganja, sigi cu falsedad, sigi den adulterio,sigi ganja bo mes, sigi gasta mas cu bo ta gana, sigi confia den wega di placa mas cu Dios,
Sigi di ta iresponsabel, sigi den fornicacion, sigi bay contra naturalesa di Dios, sigi hit and run,sigi bende arma cu hubentud,sigi instiga y sigi difama, sigi ofende y sigi insulta, sigi odia,sigi den bruheria, sigi falta respet pa mayornan,sigi den ilegalidad, sigi falta respet y temor pa Dios.
Na unda nos yuinan y nietonan ta bay hanja bon conseho y coreccion?
Bo ta kere cu na scol por duna ensenansa y nazorg na cas tambe?
Of educacion mester cuminsa na cas?
Pero e mihor manera pa lanta un mucha , ora nos como mayor ta demostra cu nos bida, kico e mucha mester haci, y esey ta sosode ora nos ta duna bon ehempel na nos yuinan, y no solamente na nos yuinan pero tambe na tur mucha, pasobra esey ta nos deber.
Palabra di Dios ta bisa cu si bo sinja e mucha for di chiki, na grandi e lo no lubida.
Si nos lesa nos Bijbel nos ta mira cu Cristo Hesus a duna su disipelnan un “on the job training, pasobra no solamente E tabata duna sinansa y instruccion di e bida cristian, pero tambe e tabata demostra kico ta e resultado ora E ta na prome lugar den nan bida.
Asina tambe un mayor mester duna testimonio cu su bida na su yiunan.
Un mucha of un hoben por cay den man di polis, pero esey no ta nifica cu mundo a caba pa e hoben ey, y esey ta su mayornan mester ocupa di esey, y no lage pa su cuenta, pero lante bek cu amor, pa asina maldad y mal amistad no gana su curason.
Awendia ta na moda cu ora bo coregi un persona , e ta pensa cu bo ta rechasa su persona.
Nos ta mira locual ta para scirbi den Isaias 5:20 ta tumando lugar, y mescos tambe locual tin para scirbi den 2 Timoteo 3:1-5.
Hende ta tuma bo na malo, ora bo duna bon conseho, pa nan busca Dios y sali for di malicia.
No laga nos lubida cu un coreccion y reprendemento di Juan Bautista tocante di adulterio a causa su bida.
Pero e palabra di Dios ta bisa claramente den Proverbionan 15:32:
Esun cu neglisha disiplina ta despresia su mes alma, ma esun cu scucha reprendemento ta atkiri comprendemento.
Romanonan 2:5 ta para scirbi: Ma pa motibo di bo capricho y bo curason cu no ta arepenti, bo ta montona furia pa bo mes, den e dia di furia,y revelacion di e huicio husto di Dios.
Proverbionan 29:1 ta para scirbi: Esun cu wordo reprendi hopi biaha, y toch ta haci nek steif, lo wordo kibra diripiente sin remedi.
Orguyo di hende lo rebahe, ma esun cu ta di spirito humilde, lo ricibi honor.( Proverbionan 29:23).
Coregi bo yiu,y e lo duna bo trankilidad, si e lo haci bo alma contento. ( Proverbionan 29:17)
Laga nos tur duna bon ehempel.
Sinceramente, Pastor Marcel Balootje
