E debate rond di e contrato pa maneho di desperdicio bou instruccion di Minister Cicilia pa wordo financia pa Aruba Tourism Authority (ATA) a sigui domina opinion publico, pero segun parlamentario Eduard Pieters lider di fraccion di Partido Patriotico di Aruba (PPA), hopi hende ainda no ta mira e berdadero problema. Segun Eduard, e asunto no ta un debate entre Gobierno y un compania priva, ni tampoco un cuestion di e containernan of limpieza di bario. E asunto principal ta hopi mas grandi: Gobierno a sigui e ley, of a scohe cua parti di e ley nan kier aplica?
Durante un entrevista na Enfoke 90, Pieters a bisa cu e fraccion di PPA nunca a opone contra e meta di logra un Aruba mas limpi. Al contrario, segun Pieters, maneho di desperdicio ta un reto nacional cu mester e solucionnan sostenibel. Pero un bon meta no por sirbi como hustificacion pa pone e procedimentonan legal cu ta proteha placa di pueblo, un banda.
“E fin no ta hustifica e medio.”
Cu e frase aki, Pieters a sintetisa henter su argumento politico. Segun Pieters, e principio aki ta e fundeshi di un Estado di Derecho. Si Gobierno por ignora un ley, pasobra e resultado final ta positivo, e ora ningun ley lo tin balor real. Pa Pieters, e pregunta cu minister mester contesta no ta si Aruba mester un mihor maneho di desperdicio. E pregunta ta hopi mas simpel y hopi mas serio.
Gobierno a sigui e ley?
PPA a sostene den Parlamento cu Articulo 21 di e Landsverordening Instelling Aruba Tourism Authority, unda ta stipula claramente cu Minister Cicilia y ATA mester percura pa sigui e procedimentonan di destaho publico, ora ta trata e contratonan cu ta pasa cierto montante financiero. Segun Pieters, despues di dos dia di debate y diferente peticion pa documentacion, PPA ainda no a haya evidencia cu a sigui completamente e proceso obligatorio di destado publico. P’esey mes Pieters a pidi Gobierno por escrito pa entrega documentacion adicional y duna splicacion completo. “E debate no ta contra un compania, no ta contra director of personanan den Raad di ATA. No ta contra haci Aruba limpi. E debate ta, si Gobierno a percura pa sigui loke ley ta indica.”
Pa Pieters, esaki no ta solamente un asunto administrativo. Ta un precedente constitucional. E parlamentario a adverti cu si acepta un excepcion awe, por habri porta pa hopi otro excepcion mañan. “Si nos acepta cu Gobierno por pasa riba ley, pasobra e meta ta bon, mañan por uza e mesun argumento pa otro contrato, otro ministerio y otro fondo publico.”
Democracia ta perde su balor
Segun Pieters, e preocupacion ta bira ainda mas grandi, pasobra Aruba ta un pais basa riba confianza den su institucionnan. E leynan di destaho publico no ta crea pa complica Gobierno, sino pa proteha e contribuyentenan, garantisa competencia husto y evita cualkier sospecha di faboritismo of conflicto di interes.
E parlamentario a bisa cu precisamente den e momentonan manera esaki, Parlamento mester para firme. “Si no tin pregunta, no tin control. Si no tin control, transparencia ta bira un palabra bashi”. Pieters tambe a bisa cu PPA no a core directamente na tribunal of na otro autoridad. Segun Pieters, e partido a prefera uza e instrumentonan democratico cu Parlamento tin disponibel: pidi reunion publico, exigi documentacion y duna Gobierno oportunidad pa aclara e situacion. Si acaso e procedura ta contra ley, mester declara e decision nulo y pone e minister responsabel. “Nos no ta busca confrontacion. Nos ta busca claridad.” Pa PPA, e berdadero peliger no ta solamente e contrato actual. E peliger ta normalisa e idea cu Gobierno por interpreta e ley manera e ta desea, ora e ta considera cu e obhetivo ta suficientemente importante. Esey, segun Pieters, lo cambia fundamentalmente con Gobierno ta funciona.
Segun Pieters, e contesta riba e pregunta ey no solamente ta determina e futuro di e contrato di ATA, sino tambe cuanto balor Aruba ta sigui duna na su Estado di Derecho, su democracia y e principio fundamental cu ningun Gobierno ta mas grandi cu e ley.
