Den november, persona cu tin un debe di estudio na DUO lo ricibi un mensahe tocante e suma mensual cu nan tin cu paga bek na 2027. Ta di gran importansia pa lesa e mensahe aki bon y pa controla si e suma mensual ta corecto. Esnan cu kier mas informacion of cu tin mester di ayudo, por acudi na november na e oficinanan di servicio di DUO den Caribe.
Controla suma mensual
Ta di gran importansia pa ex-studiantenan wak e mensahe di DUO bon. E suma mensual a wordo calcula sin tene cuenta cu nan entrada? E ora ey nan por pasa nan entrada nan mes. Di e manera aki nan ta evita di posibelmente paga bek mas cu locual ta necesario. Dependiendo di nan entrada, e suma mensual pa 2027 por sali mesun cos cu cero. Na e oficinanan di servicio, ex-studiante por acudi pa mas informacion y ricibi ayudo. Pa calcula e suma mensual, ta practico pa hiba e declaracionnan di entrada di 2024 y 2025.
Ayudo cu pregunta tocante e debe di estudio
Paga bek un debe di estudio no semper ta bay sin problema. Tin bes ta surgi un atraso den pago of no ta cla kico un persona tin cu paga. Ex-studiante por acudi cu tur nan preguntanan na e oficina di servicio. Empleado di DUO ta tuma tempo pa scucha nan situacion, duna splicacion y wak hunto kico ta e posibilidadnan. Tambe den caso di pago bek den moneda local y problema pa log in den Mijn DUO, nan ta yuda cu gusto. Asina ex-studiante ta haya mas claridad tocante nan debe di estudio y e pasonan cu nan por tuma.
DUO ta bishita Boneiru di 2 te cu 6 di november. Despues Aruba (9 te cu 20 di november) y Sint Maarten (23 te cu 27 di november). Na Saba, DUO lo ta presente dia 30 di november y 1 di december, y na Sint Eustatius dia 2 y 3 di december. Na Corsou tin un oficina di servicio habri pa un periodo mas largo desde april 2025.
Informacion pa studiante di futuro y mayornan
DUO ta organisa tambe sesion di informacion pa hoben cu kier bay studia na Hulanda y pa nan mayornan. Aki ta tuma luga na Boneiru, Aruba, Corsou y Sint Maarten den colaboracion cu hogeschoolnan Hulandes. Durante e sesionnan aki, futuro studiante lo ricibi splicacion tocante studia na Hulanda y e preparacionnan cu ta bin acerca. Tambe studiante Caribense cu ya ta studiando na Hulanda lo conta tocante nan experiencia.
Mas informacion
E fechanan di bishita actual, ubicacion, orario di apertura y informacion tocante e sesionnan di informacion ta riba duo.nl/bezoekcariben. Riba e website di DUO, ex studiante por lesa mas tambe tocante e calculacion di nan suma mensual y pa pasa nan entrada.
