Di dia 21 pa 23 di november di aña 2022, Dutch Caribbean  Nature Alliance (DCNA) hunto cu Fundacion Parke Nacional Aruba (FPNA) a organisa un workshop tocante Maneho Marino na Aruba. Delegado di tanto gobierno como organisacionnan di maneho di parke cu ta representa e islanan di Caribe Hulandes a bini hunto pa un debate profundo tocante con pa aborda e desafionan unico cu nos islanan ta enfrenta ora di proteha nos lamanan. Ta pa di prome biaha cu a organisa un workshop di e tipo aki pa Caribe Hulandes. 

Na comienso di e workshop expertonan invita di Australia, Jamaica, Reino Uni, Colombia, Merca y Aruba  a presenta ehempel di miho practica y acercamento innovativo pa protecion di e lamanan di henter  mundo, cu a wordo uza den ehercicio di resolucion di problema y discusion di mesa rondo tocante un combinacion expansivo di temanan manera maneho di parke marino, maneho sostenibel di pesca,  control y aplicacion den lama, turismo sostenibel y mapeo di parti interesa strategico. Minister Ursell  Arends, Minister di Transporte, Integridad, Naturalesa y Asuntonan di Adulto Mayor di gobierno di

Aruba, a inaugura e workshop y a describi e agenda ambicioso cu Aruba tin pa conservacion marino, cu ta inclui e establecimento di un parke marino “rond di e isla”. 

Minister Ursell Arends: “Pa hopi aña caba, Aruba a priorisa nos prosperidad economico, a costa di nos naturalesa. E ambicion ta pa expande e parke marino actual di cuater area pa un parke marino rond di e isla como parti di un meta mas grandi pa e eventual ‘Plan Espacial Marino di Aruba’. Na luga di prohibi  actividnan, e modelo di parke marino rond di e isla lo crea un mapa pa demonstra balansa sostenibel entre actividadnan humano y economico den nos espacio maritimo y tambe conservacion di bida  marino”. 

Como parte di e workshop, a invita e participantenan pa hike den Parke Nacional Arikok pa siña mas  tocante e flora y fauna diverso di Aruba. E actividad aki a sirbi como un recordatorio di pakico ta importante pa proteha naturalesa y tambe a duna FPNA oportunidad di demonstra e trabou importante cu e ekipo ta haci pa proteha y conserva naturalesa di Aruba. 

“Nos a sinti nos honra pa por a traha hunto cu DCNA pa organisa e workshop di Maneho Marino na Aruba y duna bonbini na participantenan importante y expertonan internacional pa comparti  conocemento y experencia tocante maneho marino cu e diferente representantenan di e islanan”,  Natasha Silva, Directora di Conservacion di FPNA ta comenta. “Awor mas cu nunca nos lamanan ta bou  di gran menasa, y di e workshop ta evidente cu nos tur tin plannan ambicioso pa proteha y administra e medio ambiente marino di nos isla y eyfo. E colaboracion riba nivel local y mas afo di nos islanan ta esencial den implementacion di acercamento innovativo pa proteha nos lamannan pa futuro  generacionnan. 

Esaki tabata e prome di un serie di workshop cu DCNA ta plania di realisa den e proximo añanan, cada  biaha na un diferente isla, pero tur dirigi riba maneho sostenibel di e recursonan natural y proteccion di naturalesa. E workshop aki a wordo patrocina generosamente pa colaboracion di Oceans5-financiers y  apoya pa Blue Marine Foundation y the Allen Institute for Artificial Intelligence. 

“Tabata tremendo pa mira un diversidad asina grandi di participante cu tabata entusiasma pa traha  hunto”, Irene Kingma, consehero di maneho di DCNA a bisa. “Como secretaria di DCNA, nos ta  desempeña un papel facilitado pa nos miembronan, na unda desaroyo di capacidad y intercambio di conocimento ta central”.

LEAVE A REPLY

Please enter your comment!
Please enter your name here