Durante e reunion di 12 di januari 2022 y despues di a revisa e dato economico y monetario mas recien, e Comite di Maneho Monetario (CMM) di Banco Central di Aruba (BCA) a dicidi pa hisa e tasa di reserva obligatorio di 13,0 porciento pa 14,0 porciento entrante 1 di februari 2022. E decision aki ta basa primordialmente riba e nivel halto di likides excesivo na e banconan comercial.
A considera e siguiente informacion y analisis pa yega na e decision aki:
Reservanan internacional
E reservanan internacional (incluyendo e diferencia di revaluacion di oro y reserva di divisa) a aumenta cu Afl. 757,2 miyon, te cu y incluyendo 24 di december 2021, compara cu fin di december 2020. E aumento notabel den e reservanan internacional tabata debi principalmente na entradanan relata na turismo y na fiansa di gobierno Hulandes na gobierno di Aruba como apoyo na su posicion di likides. Mientrastanto, reservanan oficial di divisa a nota un subida di Afl. 521,0 miyon. Consecuentemente, e reservanan oficial y e reservanan internacional a crece te na, respectivamente, Afl. 2.728,9 miyon y Afl. 3.113,8 miyon riba 24 di december 2021 (Grafico 1).
Grafico 1 – Desaroyo den reservanan oficial y internacional.
Di e manera aki e reservanan a keda na un nivel adecua ora di compara nan cu e nivel critico di pagonan relaciona cu e cuenta coriente di e balansa di pago y e metrico di ARA di IMF (Tabel 1).
| Tabel 1: Metriconan relata na reserva observa den 2021 | ||||||||||||
| jan | feb | mrt | apr | mei | jun | jul | aug | sep | okt | nov | dec | |
| Metrico di IMF ARA | 108,7 | 106,7 | 103,2 | 105,2 | 104,8 | 105,4 | 113,1 | 112,4 | 113,3 | 107,2 | 114,2 | 120,7 |
| Cobertura di pagonan riba cuenta coriente | 8,3 | 8,4 | 8,7 | 9,2 | 9,0 | 9,0 | 9,5 | 9,3 | 8,9 | 8,9 | 8,9 | 8,6 |
Desaroyonan den credito
Durante november 2021, credito total di e banconan comercial a baha cu Afl. 145,1 miyon of 3,7 porciento te na Afl. 3.819,0 miyon, compara cu fin di 2020. E bahada aki tabata debi na e categorianan ‘otro’ (-Afl. 83,7 miyon of -16,3 porciento), ‘credito na empresa’ (-Afl. 32,4 miyon of -2,1 porciento) y ‘credito na individuo’ (-Afl. 29,0 miyon of -1,5 porciento). E bahada den e categoria ‘otro’ a resulta primordialmente door cu banconan comercial local tabata tin un cantidad mas abou di bononan di gobierno. E categoria ‘credito na individuo’ a cay pa motibo di un demanda mas abou pa ‘credito na consumidor’, mientras cu e categoria ‘credito na empresa’ a ser impacta principalmente door di caida den fiansa riba cuenta coriente.
Inflacion
Na november 2021, e Indice di Prijs di Consumo (CPI) tabata 3,1 porciento mas halto compara cu e mesun luna di e aña anterior. E promedio anual di e tasa di inflacion a alcansa 0,2 porciento na november 2021, cual ta 0,5 porciento mas halto cu e luna anterior (Grafico 2). E subida den CPI compara cu e aña anterior tabata causa primordialmente door di crecemento den prijs den e componentenan di ‘transporte’ (contribuyendo cu 1,8 punto di porcentahe) y ‘vivienda’ (contribuyendo cu 0,5 punto di porcentahe). E promer tabata relata na incremento den prijs di petroleo cu a resulta den un aumento den prijs di gasolin, mientras cu e ultimo tabata relata na un subida den prijs di mantencion y reparacion di vivienda. E prijsnan eleva pa mantencion y reparacion di vivienda probablemente por tabata relata na e escasez global di suministro.
Grafico 2 – Inflacion
Likides di banconan comercial
E total di likides excesivo na banconan comercial a subi te na Afl. 1.295,8 miyon na november 2021, compara cu Afl. 1.107,4 miyon na december 2020 (Grafico 3).
Grafico 3 – Desaroyo den likides excesivo
Comparacion mensual a mustra cu e total di likides excesivo a permanece igual na november 2021 compara cu oktober 2021, aunke a hisa e tasa di reserva obligatorio cu un porciento riba 1 di november 2021. Un expansion den e nivel total di fondonan di likides na e banconan comercial, a mitiga e subida den e tasa di reserva obligatorio. Consecuentemente, e nivel di likides excesivo a keda mescos y significantemente riba e nivel di prome cu e pandemia.
E nivel amplio di likides excesivo ta parcialmente causa pa e falta continuo di demanda pa credito na e banconan comercial local. Adicionalmente, e aporte di FASE y subsidio di salario duna door di gobierno di Aruba pa mitiga e efectonan economico di e crisis relata na COVID-19 a contribui na e nivel eleva di likides excesivo.
Na mes momento, e asina yama “prudential liquidity ratio” di e banconan comercial, cual ta midi e porcentahe di activo likido compara cu e activo total netto di e banconan comercial, a keda na un nivel comfortabel di 37,9 porciento den november 2021, cual ta basta mas halto cu e asina yama “prudential liquidity ratio” minimo rekeri di 18,0 porciento.
Banco Central di Aruba
