Fin di November den oranan di marduga e noticia a drenta cu na cas di un ex parlamentario na Savaneta, Donny Rasmijn, un mucha muher di 26 aña, Elida Arteaga,  a ser haya morto, despues cu un amigo di dje,  cu no por a drenta den contacto cune a bay busca su drechi na dicho cas. A kibra e porta di cas y a haya e curpa ya sin bida.

Lo mas factible, teniendo en cuenta e sistema di traha di periodismo, na unda semper kier ta prome cu un noticia, nada no a ser notifica di e hecho aki. Y hasta lo bo por a pensa cu quizas e motibo lo ta cu a confisca e curpa  y tanten cu no tin claridad voceru policial no ta hasi mencion di e caso.

Leu di esey, pasobra e curpa nunca a wordo confisca. Ningun cuerpo policial a hasi acto di presencia pa hasi mas investigacion na e agencia funebre. Ta como si fuera NADA no a pasa.

KENDE TA ELIDA

Elida Arteaga ta un studiante di Universidad cu a caba di traha riba su tesis y entrega esaki, ta den flor di su bida, ta un yoga practicioner y mas cu tur otro cos tin un razon grandi y unico pa biba. Riba e dia cu su bida a ser ranca, e tabata bezig cu su bukinan, studiando.

LUGAR DI HECHONAN

Pa motibonan fuera di lo comun, e ultimo dianan di su exsistencia, e lugar di hospedahe tabata serca su intima amiga. Den e cas aki ta biba e donjo di cas cu ta na Bonaire y un cabayero Colombiano.

E cas tin camera y ta wordo vigila 24/7 pa un par di persona dilanti di e residencia pa e casa cu ta na Hulanda. E lugar ta conta cu un entrada central. Un na banda di e garage. Y un entrada patras di e cas. Ningun tabata mustra di ta forza. Solamente na unda e amigo a drenta pa yega na e curpa.

Ta na mesun lugar di hechonan aki cu e mayornan, den oranan di marduga y despeus di a yega serca nan jui, cu nan a wordo notifica dor di e Colombiano, cu tur cos cu ta pertenencia di e fayecido mester wordo remove inmediatamente for di e cas y tambe pa entrega e telefon cu ta di e amiga cu ta na Bonaire. Esaki pa ordo di e amiga na Bonaire.

PAKIKO MISTERIOSO

E ta keda algo misterioso, debi na kende e fayecido ta. Ningun persona cu conoce di serca sa y ta convenci cu e lo no por a hasi algo asina y voral NO awor. Tur sa su caracter di luchador, di vencedor. E pregunta ta keda dicon e proceduranan rond di e hayazgo di e curpa no a wordo sigui manera ta prescribi pa ley. Dikon no a pidi pa un autopsia. Dikon e fayecido tin tanto muestra di sla na su curpa, su hunjanan ta lanta y cu sanger. Pakiko e donjo di cas NO a aparece te dia di awe. Kende a wordo notifica cu algo a pasa, cu a hasi cu e amigo a bay investiga.

Kiko a para cu e grabacion cu tin na e cas di e ultimo oranan di e bida di e fayecido. Kiko a para cu e ultimo grabacionan riba e telefon y yamadanan hasi y na kende. Un ser asina prometedor no por ser kita for di e exsistencia di bida sin un pakiko. Pa clarificacion e mayornan ta enfatisa cu na ningun momento por ser sikiera pensa cu aki ta trata di un suicidio. Ta leu for di nan mente ya cu nan yui ta un muher balente cu ta surpasa tur obstaculonan den su bida y ta busca e mihor practicanan pa soluciona tur problema. Un bon studiante cu un trabao y futuro prometedor. 

E mayornan ta exigi un contesta, a pidi pa un autopsia y ta pidi pa un clarificacion di e hechonan rond e ultimo dianan di bida di nan yui.  Nan ta exigi e grabacionnan.

Un bida asina bunita hiba y tan cruelmente termina.

No mas sentido pesame y cu su ser por haya sosiego y luz eterno luza pe.

LEAVE A REPLY

Please enter your comment!
Please enter your name here