Den e Evangelio di awe Hesus ta splica tocante e parabola di e sembrado.Hesus ta e sembrado cu ta sembra e simia cu ta e palabra di Dios den nos curason. Awo e simia a cay den diferente tereno. E pregunta ta: ki tereno nos curason ta ? Nos curason ta duro manera baranca y ta stek e palabra di Dios of nos curason ta yena di cosnan di mundo y ta stroba e palabra di Dios di tira rais of nos ta scucha e palabra di Dios cu nos horeanan y no ta lag’e drenta nos curason y despues di un rato nos ta lubida tur cos. Pa nos por duna fruta nos curason mester ta tera fertil, un curason noble y humilde cu ta obediente y dispuesto pa cumpli cu e palabra di Dios. Asina aunke nos por haya nos den tur sorto di pruebanan nos ta keda tene duro na e palabra y ta persevera y ta duna fruta y fruta na abundancia.
Oracion: Tata amoroso y bondadoso, duna mi e gracia pa mi por tin un curason semper habri pa bo palabra por penetra te den tutu di mi wesonan y duna fruta na abundancia pa medio di Cristo nos Señor. Amen.
