Pabien Aruba – Pabien Pueblo di Santa Cruz
E noticia a drenta diamars mainta cu e borchi a wordo lanta cu nomber di Laura Wernet Paskel na un caya y hofi na Hulanda, cu despues di algun aña den proceso porfin a keda cla.
Famia di Laura Wernet-Paskel na Aruba y na Hulanda conhuntamente cu Stichting Laura Wernet-Paskel tin e grato honor di informa Pueblo di Aruba di e decision tuma dia 31 di augustus 2021 di e Gemeentebestuur di Den Haag Hulanda, esta “Het College van burgermeester en wethouders”, asigna un caya y un hofi na nomber di señora Laura Wernet-Paskel (1911-1962).
E decision di Gemeentebestuur di Den Haag di dia 31 augustus 2021, no. DSO/10126558, ta menciona na punto 7:a , lo siguiente:
VII. de naam Laura Wernet-Paskelhof, Laura Simona Wernet-Paskel (1911-1962), schrijfster, onderwijzeres, eerste politica op Aruba, met straatcode 22071 toe te kennen aan de nieuwe openbare ruimte, als aangegeven op de bij dit besluit (kenmerk DSO/10126558 van 31 augustus 2021) behorende, en als zodanig gewaarmerkte tekening Naamgeving Openbare Ruimte met tekeningnummer DSO.GI.323;
Por download e decision for di e link https://denhaag.raadsinformatie.nl/.
E aclaracion di e decision aki ta como lo siguiente:
Laura Wernet-Paskel
Laura Simona Wernet-Paskel (1911-1962)
Als schrijfster publiceerde Laura Wernet-Paskel poëzie en verhalen. Ook deed zij onderzoek naar de geschiedenis van Aruba, waarvan de resultaten lang na haar dood gepubliceerd zijn onder de titel ‘Ons eilandje Aruba’. Ze was ook onderwijzeres en de eerste politica op Aruba.
Banda di Laura Wernet-Paskel tin 7 otro dama mas cu tambe a haya un caya na nan nomber na Den Haag.
Nan ta: Annelies Marie Frank (Anne Frank, 1929-1945); Barbara Augustine (Guusje Nederhorst, 1969- 2004); Ida Simons-Rosenheimer (1911-1960); Raden Adjeng Kartini (1879-1904); Margaretha D. Fortuin Leenmans (1909-1998); Helga M.E. Ruebsamen (1934-2016) y Ellen Warmond (1930-1911). Ta bon pa menciona cu tur e cayanan aki ta keda den un bario/districto completamente nobo na Den Haag, Hulanda. Oficialmente e caya ta cay den e plan di construccion Erasmusveld Midden.
Administrativamente e caya nombra na Laura Wernet-Paskel ta existi caba y ta aparece den e registro Basisregistratie Adressen en Gebouwen (BAG).
Famia Laura Wernet-Paskel y tambe Stichting Laura Wernet-Paskel ta sumamente agradeci na señor Elias Araab, e persona principal den e proyecto aki di nombramento di un caya na Laura Wernet-Paskel. Por cierto un persona cu no ta Arubiano, ni Antiyano of Hulandes, sino procedente di Medio Oriente. Señor Elias Aarab a keda hopi impresiona cu e buki di Laura Wernet-Paskel “Ons Eilandje Aruba” y tambe cu Laura su historia como maestra di school y e prome politico femenino na Aruba. Tabata su propio iniciativa pa acerca e Bestuurscollege na Den Haag Hulanda cu e proposicion pa asigna un caya na e persona ehemplar aki.
Su proyecto mes a inicia como 4 aña pasa y te awor cu tur cos a keda cla, señor Araab a dicidi di divulga e noticia tremendo y noble aki na Famia Wernet.
P’esey, un biaha mas, nos ta extende un agradecimiento cordial na señor Elias Aarab y su famia den nomber di Aruba completo. Aruba pabien, bo merece esey. Pa casualidad dia 8 september 2021 ta recorda 59 aña di fayecimento di Laura Wernet-Paskel, kende ta dera den santana banda misa Santa Famia na Santa Cruz.
Ta yena nos di e fundacion Laura Wernet-Paskel cu hopi orguyo, ya cu ta un yiu di tera di Aruba ta keda reconoci den Reino Hulandes di e manera aki.
