E reciente firma di un acuerdo cu Royal Schiphol Group (RSG) ta mustra un gobierno debil, mientras ta permiti un compania stranhero sigui chupa e sanger financiero di Aruba su aeropuerto.
E mentira di “Balor Agrega”
RSG ta priminti “experiencia internacional” pero en realidad, despues di 20 aña di maneho, ainda nos no tin un director local capacita, segun nan a bisa. Aeropuerto ta paga 6.7 miyon florin anual pa basicamente mantene status quo y awo nan kier redobla e tarifa pa mas di 10 miyon florin mientras ta mustrando un tendencia cu e cantidad di turista lo por baha pa 2025.
Di 6.7 miyon pa 10 miyon
Un aumento escandaloso awo cu RSG ta exigiendo un aumento di casi 50% pa nan tarifa anual – di 6.7 miyon florin pa mas cu 10 miyon florin – e pregunta ta: kico exactamente Aruba ta haya a cambio? Ta pronostica cu aeropuerto por genera menos pasahero den 2025, e infrastructura ta keda mescos y ainda no tin un plan cla pa desaroyo di personal local.
Fracaso total di vuelo for di Europa
RSG Schiphol nunca pero nunca a logra atrae ningun aerolinea nobo desde Europa pa Aruba. Ni desde Italia, ni Spaña, ni Francia, ni ningun otro pais Europeo importante. Turismo Europeo ta keda alarmantemente hopi abao na Aruba y hasta aki Schiphol no a aporta cu nada. Cu 20 aña di maneho y acceso na su red internacional, nan no a logra ningun expansion di airlift desde Europa – un fracaso inaceptable pa un operador cu ta cobra miyones.
E wega di poder di Schiphol RSG
Schiphol no ta satisfecho cu nan ta cobra un tarifa exhorbitante. Nan ta exigiendo un puesto permanente den Raad van bestuur, dunando nan derecho di voto riba decisionnan clave di nos aeropuerto.
Excpecion di salario maximo
Ademas, nan kier un excepcion special riba LNT pa por paga nan director salario exhorbitante.
E Fracaso di “Capacity Building”
Den 20 aña di supuesto “capacity building”, RSG a fracasa completamente den entrenamento di liderazgo local. Niun CEO Arubano a wordo prepara, un fracaso cu ta parce deliberadamente pa mantene control. Sinembargo nos ta di opinion cu na Aruba si tin personal capacita.
Preguntanan cu Gobierno no kier contesta
Pueblo ta exigiendo contesya na preguntanan clave: Con ta posibel cu un compania cu a fracasa den atrae vuelonan Europeo y den entrenamento local merece mas placa? Pakico nos ta permiti un grupo stranhero tin tanto influencia riba nos infrastructura clave?
Un negoshi cu Aruba ta perde
E supuesto “partnership” cu Schiphol ta resultando di ta un negoshi cu ta costando Aruba mas cu ta produci. Nan no a cumpli cu nan promesanan di airlift internacional, no a desaroya capacidad local y awo nan kier mas pago. Esaki no ta colaboracion, sino colonialismo corporativo cu ta beneficia solamente Schiphol.
