Ex-Prome Minister di Aruba Nel Oduber den un publicacion haci riba Facebook, a enfatisa lo siguiente: “Mirando e decisionnan cu presidente di Merca ta tumando cu sigur tin un influencia dramatico riba nos turismo y clima di inversion, lo ta bon mi duna un contribucion. Danki na Merca nos a conoce un desaroyo di casi un decada completo cu refineria y nan ta nos bishitante y doño di varios cadena hotelero estableci aki.
Nos mester biba cu e realidad cu fuera cu e relacion cu Hulanda, ta imperativo pa mantene un canal continuo di contacto cu politiconan, lobbyistanan cu por yuda nos establece contacto directo cu personanan di hopi influencia na Merca. Nos tabatin e suerte desde 1989 cu nos a yega den e prome gabinetenan via amigonan di berdad Mericano, a trece nos den contacto directo cu un persona cu a bira mi amigo personal cu yama Bob Keefe, kende tabata por a trece nos den contacto cu e hendenan cu nos mester a papia cu nan.
Ta conoci despues di 1989 cu Merca a pone Aruba riba lista preto pa motibu cu nos tabata ser uza pa traficacion di droga y labamento di placa y nos zona franca pa trece acetona pa traha coca y manda Colombia. Merca tabata hopi disgusta cu esaki y hasta e embahador Mericano na Hulanda a keha esaki cerca gobierno Hulandes.
Mi tin esaki! Bo lesa e rapportnan di “Narcotics Strategy Report“ y e casonan cu Merca a obliga nos extradita hasta 3 local, bo sa di kico mi ta papia. Nos gobierno a start un proceso di kita e mancha preto riba nos pais y a logra den esaki via contactonan. E issuenan mas importante pa Merca tabata no laga criminalidad internacional podera di nos isla. Nos gobierno mesora na 1990 a organisa cu ayudo di Hulanda y Merca un conferencia pa henter Caribe contra labamento di placa y traficacion di droga y nos a adopta un gran cantidad di resolucion pa nos den e region. Esaki a habri tur porta na Merca pa nos. E otro ta colega Rudy Croes dfm. cu mi persona a convence Hulanda pa hunto cu Antias, Aruba y Hulanda bin cu Kustwacht pa combati “grensoverschrijdende criminaliteit”.
Nos gabinete cu hecho aki a mustra cu nos ta duna nos contribucion pa combati traficacion di droga y labamento placa. Door di esaki den e gabinetenan cu mi a guia, nos a logra di kita Aruba for di e lista preto y a logra di firma un “TIEA “ cu ta un Tax Informacion Exchage Agreement cu varios inversionista Mericano no ta paga dubbele belasting y nos por duna nan tur informacion. Esaki a sosode 24 november 2003, unda Reino a permiti mi firma den nan nomber.
Nos tabata algo asina hasta prome cu Hulanda mes. Despues e contrato cu Gabinete Eman a cera cu Merca pa US custom and immigration pre-clearance a caduca y Obama den su decision di austeridad kier a cera esun di Aruba, nos mester a actua mesora! Via nos lobbyista na Merca nos a yega directamente cerca e minister encarga cu tabata Mitchell Chertoff kende a ser splica di e balornan di e pre-clearance pa nan tambe y pa nos. Mi a pidi nan cu nos tin un parti cu un aeropuerto pazuid di esun existente cu nos kier promove e doñonan di nan private jet pa pasa Aruba haya e pre-clearance aki y sigui pa bay Merca cu lo por trece hopi negoshi pa nos.
Dia 22 maart 2008 mi a logra convence e Mericanonan pa no cera e pre-clearance y hasta amplia esaki cu un FBO “Fixed Based Operation”. Den mi biahenan pa Merca mi a hasta topa e minister pa cu relacionnan di exterior, un señora masha simpatico, Condoleeza Rice. Mi tabatin como e unico gobernante di Aruba a ser invita pa discuti e situacion den Caribe y con mi ta mira esun di nos region cu director di “CIA“, Porter Goss na su bunker na Virginia.
Mescos nos tabatin contactonan directo cu State Department y varios miembro di Congreso cu mi a bishita y a discuti cooperacion cu nos isla.
Un importante tabate Payne cu tabata presidente di e Kaukus Group pa henter Caribe cu semper a ricibi mi pa nos discuti. Asina nos tabatin contacto cu hende cu a habri porta grandi pa nos, manera na Florida cu St. Ricky Scott, Patronis etc.
Mi a bay di gobierno desde 2009 y a mira cu e contactonan cu Merca a mengua. Mirando e decisionnan cu Merca ta tumando lo ta bon pa esnan den gobierno siña con nos a logra hopi cos grandi pa Aruba cu na Merca ta imperativo pa bo tin lobbyista cu tin contacto y influencia otherwise bo ta perdi. Hasta un paar di aña pasa na Florida mi a haci contacto cu un paar cu a yuda nos den pasado. Pa bo logra cos, e contacto personal ta imperativo. Hulanda den esaki lo no saca un man pa nos, pasobra nan ta percura pa nan mes. Ta nos mester haci cos pa nos mes. Merca su hendenan durante e 4 gabinetenan y despues a trata Aruba hopi bon, ban den e momentonan dificil y insiguridad aki ban purba habri porta atrobe. Mi ta ilustra e contactonan cu un paar di pics, pero tin hopi mas di e atencion cu mi tabata haya na Merca. Un contribucion di nos historia con ta haci y logra cos como pais chikito cu Merca”.
