Edmundo Josiah y Monica Fajardo a bishita Brazil Taekwondo Stichting pa mira con e team di Train Hard Fight Smart ta train pa asina haña un bista di e training. Edmundo Josiah y Monica Fajardo a hiba palabra na e team y a splica nan kiko ta e meta di Comite Olimpico Arubano “COA” y kiko nan ta buscando den atleta pa ta parti di Comite Olimpico Arubano.
Pa un atleta forma parti di pre seleccion di COA mester presenta un plan di entrenamento y cumpli cu esaki pa asina COA por tuma e atleta den e team pa representa Aruba den e eventonan cu ta cay bou di COA. E meta pa cada atleta ta pa por representa Aruba den weganan olimpico, pero pa yega asina leu tin un preparacion y un plan di entrenamento y eventonan. Taekwondo ta conoce dos manera pa clasifica pa weganan Olimpico cu ta clasifica den area di Caribe, Wild Card y cu Ranking di Mundo.
Actualmente e team di Train Hard Fight Smart su adultonan ta bou guia di Monica Pimentel y Stuart Smith. Rumannan Klabér a participa den varios eventonan internacional unda cu Monica Pimentel a logra trece varios medaya pa Aruba.
Edmundo Josiah y Monica Fajardo a duna di conoce cu esaki lo no ta e prome ni e ultimo di nan bishita. Nan lo keda haci bishita inespera pa wak si di berdad ta cumpli cu e plan di entrenamento.
