Elite Productions Aruba, un di Aruba su companianan prominente di servicio audiovisual, ta contento pa anuncia su participacion exitoso na InfoComm 2023. E conferencia aki ta esun di mas grandi den Merca. E evento, organisa na Orlando, a sirbi como un plataforma importante pa Elite Productions Aruba por explora e ultimo inovacionan den productonan y servicionan di e.o sonido, video, stage, decor pa scenario, efectonan di luz y mas.
Na InfoComm 2023 un sin fin di companianan renombra a comparti hopi producto y tecnologianan nobo pa cu e industria di audiovisual. E ekipo di Elite Productions Aruba a ricibi e oportunidad pa conecta cu hopi di e companianan aki y compronde e futuro di e industria aki.
Tambe e ekipo di Elite a participa na diferente tayer pa asina amplia nan conocemento. Tur e esfuersonan aki lo permiti e compania pa eleva nan servicionan y brinda nan clientenan valioso un mihor producto/servicio.
“E experencia na InfoComm 2023 a resulta di ta transformador pa nos,” Egmar Irausquin, Director Creativo di di Elite Productions Aruba a comenta. “Nos ta yen di un energia nobo y nos determinacion pa entrega excelencia ta mas fuerte cu nunca. Nos ta ansioso pa introduci e avansenan nobo den e industria aki na nos clientenan na Aruba y Caribe.”
Elite Productions Aruba ta extende su aprecio sincero na e organizadornan di InfoComm pa organisa e evento excepcional aki. E compania tambe ta elogia nan ekipo cu a representa Elite Productions Aruba cu pasion, experticio, y entusiasmo , reafirmando nan compromiso pa excelencia audiovisual.
