Embahador di Reino Hulandes na Peru, Alexander Kofman, a califica e bishita oficial di Prome Minister Mike Eman na Lima como un exito grandi pa Aruba, Peru y Reino Hulandes. Prome Minister Eman a bishita Peru pa representa Reino Hulandes durante e instalacion di Keiko Fujimori como presidente di Republica di Peru. Segun embahador Kofman, presencia di Prome Minister tabata un señal importante cu Reino ta presente na Peru y ta desea e presidente nobo y su Gobierno hopi exito durante e siguiente cinco aña.
“Tabata hopi agradabel pa tin Prome Minister Eman aki na Peru pa e instalacion di presidenta Fujimori. Su presencia a mustra cu Reino Hulandes ta presente y cu nos ta un socio importante den economia, seguridad y sostenibilidad”, Kofman a declara. Segun e embahador, Prome Minister Eman a logra transmiti e mensahe aki claramente durante su diferente encuentronan cu mandatario, autoridad y representante di sector priva.
Conocemento y cooperacion
Embahador Kofman a indica cu tanto Reino Hulandes como Aruba tin conocemento y experiencia cu por contribui na e prioridadnan di Gobierno Peruano. Entre e areanan menciona tin sostenibilidad, maneho di awa, preparacion pa impacto di fenomeno El Niño y combati crimen organisa y actividad cu ta debilita institucionnan. “Como Reino Hulandes y como Aruba nos tin hopi conocemento riba temanan manera sostenibilidad. Cu El Niño acercando, tin hopi espacio pa traha hunto. Esaki ta conta tambe pa tur loke tin di haber cu combati crimen organisa”, Kofman a splica. Segun e embahador, ya tin un cooperacion amplio entre Peru y Reino Hulandes, pero ainda tin hopi posibilidad pa amplia y profundisa e relacion.
Wageningen na Aruba
Un di e desaroyonan cu Kofman a destaca ta e intencion pa Wageningen University & Research establece un presencia na Aruba. E embahador ta mira esaki como un oportunidad importante pa Aruba bira un punto di conexion entre e conocemento di Wageningen y e necesidadnan di Latino America. “Nos a haya e bon noticia via Prome Minister cu Wageningen lo establece su mes na Aruba. Nos ta mira hopi posibilidad pa, for di Aruba, comparti e conocemento di Wageningen University cu America Latina”, Kofman a declara. Wageningen ta conoci internacionalmente pa su experiencia den agricultura, produccion di alimento, naturalesa, sostenibilidad y maneho di awa. Un presencia na Aruba por contribui na investigacion, intercambio di conocemento y desaroyo di solucionnan adapta na realidad di Caribe y Latino America
Kofman a destaca tambe importancia di relacion comercial entre Hulanda y Peru, especialmente den sector agricola. Segun e embahador, Hulanda ta un destino importante pa productonan manera fruta y berdura fresco Peruano y tin espacio pa comercio sigui crece.
Conectividad entre Aruba y Peru
E vuelo directo entre Lima y Aruba ta otro elemento cu ta fortalece e relacion. Actualmente tin un conexion directo durante tur dia di siman. Kofman a expresa speransa cu e conectividad lo sigui aumenta, teniendo cuenta cu Lima y Aruba por funciona como punto strategico di conexion den region. “Mi ta spera cu e conexion lo sigui crece. Lima y Aruba ta dos punto importante den region. Esaki por yuda pa mas persona for di Peru y resto di Latino America bishita Aruba”, e embahador a bisa. Na mes momento, e conexion ta crea oportunidad pa turista cu ta bishita Aruba combina nan biahe cu un bishita na Peru. Kofman a destaca Peru su gastronomia, cultura y diferente atraccion como elementonan cu por interesa bishitantenan cu ta biaha via Aruba.
Reino representa na nivel halto
Durante su estadia na Lima, Prome Minister Eman a papia cu diferente presidente y hefe di Gobierno presente pa e ceremonia di instalacion presidencial. Segun Kofman, Prome Minister su conocemento di region y su contacto cu e lidernan internacional a contribui na exito di e bishita. “E bishita tabata un gran exito. Prome Minister conoce e region bon, a papia cu hopi presidente y cu diferente hefe di Gobierno. Ta hopi importante pa Reino ta representa aki na un nivel asina halto”, embahador Kofman a conclui. E bishita a fortalece e posicion di Aruba como un puente entre Caribe, Reino Hulandes y Latino America. E encuentronan na Peru a crea perspectiva nobo pa cooperacion den economia, turismo, agricultura, seguridad, sostenibilidad y intercambio di conocemento.
