Prome Minister Mike Eman ta mira un oportunidad pa Aruba fortalece su posicion den Latino America, no solamente como destino turistico, sino tambe como un pais cu por exporta conocemento, servicio profesional y solucionnan sostenibel. Durante su bishita na Peru, Eman a experimenta un recepcion caloroso pa Aruba y Reino Hulandes. Segun Prome Minister, presencia di Aruba durante e instalacion di Presidente Keiko Fujimori a confirma cu Reino Hulandes no ta limita na Europa, sino tin tambe un presencia importante den Caribe y cerca di Latino America. “Cada biaha cu Aruba ta aporta na e region, nos ta contribui tambe na engrandecemento di nomber di Reino Hulandes. Na mes momento, nos ta establece Aruba su propio posicion den e relacionnan cu America Latina”, Eman a declara.
Latino America como mercado pa Aruba
Gobierno di Aruba ta buscando forma nobo pa diversifica economia y crea e oportunidadnan cu no ta depende solamente di turismo. Eman ta mira e paisnan den Sur America como un mercado unda Aruba por exporta servicio, conocemento, innovacion y experiencia . E meta ta pa nos isla funciona como un brug entre e institucionnan di Reino Hulandes y e paisnan den Caribe y Latino America. “Nos ta activamente buscando posibilidad pa Aruba exporta servicio y conocemento. Nos kier mira e region di Latino America como un mercado”, Prome Minister a bisa. Segun Eman, e modelo aki por genera actividad economico nobo y trabou na nivel profesional pa Arubiano. Na mes momento, e paisnan den region por beneficia di e conocemento specialisa cu Aruba por facilita via su relacion cu Hulanda.
Wageningen como prome prueba
Un iniciativa importante den e vision aki ta e colaboracion cu Wageningen University & Research, WUR. Gobierno di Aruba y WUR a firma un carta di intencion pa explora posibilidad di establece un presencia permanente di e instituto na Aruba. Eman ta mira un futuro presencia di Wageningen como un prome prueba di e manera cu Aruba por funciona como centro di conocemento pa region. “Loke nos kier logra hunto cu Wageningen ta pa nos por exporta nan conocemento den un forma cu ta necesario den e region aki”, Prome Minister a declara. Wageningen tin experiencia internacional den agricultura, alimento, biodiversidad, naturalesa, maneho di awa y adaptacion na cambio climatico. E areanan aki ta importante tanto pa Aruba como pa diferente pais pa zuid di nos isla unda Aruba tin ambicion y un posicion strategico entre e continente Latino Americano y Europeo.
Solucion pa retonan di Peru
Durante su bishita, Prome Minister Eman a identifica diferente reto na Peru den cual Wageningen eventualmente por contribui cu investigacion y asistencia tecnico. Peru ta vulnerabel pa cambio climatico y fenomeno El Niño. E fenomeno por causa periodo di awasero extremo, inundacion y daño na agricultura, pero tambe situacion unda awasero no ta cay mes den otro parti di e pais. “Peru tin hopi reto relaciona cu cambio climatico. Fenomeno El Niño tin consecuencia grandi pa agricultura, y Wageningen tin hopi experiencia den con por organisa sector agricola den un manera mas sostenibel y resistente”, Eman a splica. Maneho di awa ta otro area cu tin potencial pa cooperacion. Peru tin periodo cu tin exceso di awasero, alterna cu temporada cu tin secura.
Segun Eman, conocemento di Wageningen por yuda den desaroyo di sistema pa reserva y conserva awa, y pa usa e recurso aki den un manera mas eficiente den agricultura. WUR por contribui tambe cu experiencia den conservacion di naturalesa, biodiversidad y vegetacion. Aruba ya ta traha cu Wageningen den diferente proyecto relaciona cu rif di coral, yerba di lama, manglo y fauna den peliger di extincion.
Oportunidad pa profesional Arubiano
Eman a indica cu Aruba a intenta anteriormente pa fortalece colaboracion cu Wageningen. Durante Eman su prome y di dos mandato, e proceso a avansa, pero despues no a continua ora gobierno a cambia di signatura. Awor tin un oportunidad nobo pa realisa e vision. Segun Prome Minister, embahada di Reino Hulandes na Peru ta entusiasma cu e posibilidad pa usa Aruba como base pa conecta conocemento hulandes cu necesidadnan di Latino America. E iniciativa por crea trabou na nivel halto y oportunidad profesional pa Arubiano den investigacion, educacion, agricultura, sostenibilidad y cooperacion internacional. “Nos ta mira esaki como un situacion di beneficio mutuo. E ta agrega balor pa Reino Hulandes, pa Aruba y pa e paisnan di Sur America. Wageningen por ta e prome prueba cu e modelo aki por funciona”, Eman a declara.
E vision ta posiciona Aruba como un plataforma di conocemento den Caribe: un luga caminda experiencia hulandes, talento Arubano y e necesidadnan Latino Americano por bini hunto pa crea e solucionnan concreto.
