Diaranson mainta miembronan di FTA laborando na Cuerpo Especial Arubano (CEA) y staciona na Corte di Husticia a duna oido na e peticion di sindicatonan uni pa uni nan mes na e Dia Nacional di Protesta contra e continuacion di retencion di 12.6% di salario, poniendo trabao abao den forma di protesta for di 8:00 pa 9:00 di mainta.
Sindicatonan uni ta exigi pa para e retencion riba salario di e empleadonan publico y semi-publico prome cu bai mesa cu Gobierno di Aruba pa discuti e forma con den futuro lo duna contenido na e exigencia di Gobierno Hulandes pa cu reduccion di gastonan di e aparato gubernamental.
