Den cuadro di Dia di Betico, Prome Minister Evelyn Wever-Croes a bishita Scol Muchila Creativo na unda un grupo di muchanan special ta haya les parti mainta. Directora di scol Muchila Creativo, sra Rose-Marie Provance hunto cu su team y tur e muchanan, a duna Prome Minister un caluroso bon bini cantando e Himno Nacional di Aruba. 

Pa Prome Minister Evelyn Wever-Croes, e grupo di muchanan aki ta hopi special y tabata un placer pa su persona di por a wak e progreso den cada un di nan. Tabata un mainta ameno na unda cu Prome Minister a conta nan e historia di nos Gran Libertador. 

Den preparacion pa Dia di Betico, e muchanan a haci pinturanan bunita y esaki ta algo cu Prome Minister a expresa, e lo desea di wak na tur e scolnan cu e y su team ta bishitando den e proximo dianan. 

Na final di e encuentro aki, e muchanan a canta, baila y duna Prome Minister un rondleiding di e scol. “Mi a keda hopi impresiona di con bunita dorna e luga a keda y mas ainda di e forma con ta atende cu e muchanan”, Prome Minister Evelyn Wever-Croes a termina bisando. 

LEAVE A REPLY

Please enter your comment!
Please enter your name here