Gobierno di Aruba a introduci dia 2 mei 2022 e ley cu ta limita uzo di productonan di tabaco y Horacio Oduber Hospital (HOH) na su luga como un instancia publico mester cumpli cu e ley nobo aki. Un di e metanan di e ley aki ta pa desanima publico pa haci uzo di productonan di tabaco. Entrante 1 di maart 2023 HOH, LABHOH y Bloedbank ta liber di huma. Esaki ta nifica cu no ta permiti humamento riba tereno di HOH, LABHOH y Bloedbank ni tampoco paden di edificio. Esaki ta conta tambe pa e parkeo y tambe pa tur policlinica rond di HOH. Pues tene bon na cuenta cu desde 1 di maart 2023 HOH ta pidi comunidad di Aruba pa colabora y asina hunto haci nos Hospital uno liber di huma.

HOH, LABHOH y Bloedbank tin como punto di enfoke brinda e miho cuido y servicio na nos pashentnan y clientenan. E salud di nos empleadonan, pashentnan y bishitantenan ta nos prioridad y p’esey como e unico hospital riba e isla y pues tambe embahadornan di cuido di salud na Aruba a tuma e decision pa haci Hospital liber di huma y no sigui facilita humamento mas. E regla aki  ta valido pa tur hende y ta  inclui entre otro sigaria, otro productonan di tabaco, sigaria electronico y cualkier otro tipo cu tin como contenido tabaco.

Desde september 2022 ya a introduci zonanan temporario di huma riba tereno di HOH pa empleado, pashent y bishitante pa asina cuminsa promove un hospital liber di huma. E zonanan temporario aki lo por wordo uza te dia 1 di maart 2023. Como ‘zona di tolerancia’ pa pashentnan y bishitantenan tin temporalmente asigna banda di departamento di emergencia y esaki ta ser indica cu marcanan riba vloer. Pues si ta humando pafo di e ‘zona tolera’ nos lo pidi’bo encarecidamente pa stop y pa pasa unda si ta permiti humamento te cu 1 di maart 2023.  

HOH, LABHOH y Bloedbank ta consciente cu esaki por tin un impacto grandi riba esnan cu tin un adiccion na tabaco. Nos ta spera di por conta cu sosten y cooperacion di comunidad henter pa asina hunto nos traha riba prevencion y alabes e impacto positivo riba salud publico.

LEAVE A REPLY

Please enter your comment!
Please enter your name here