Ta bon pa nos tene na cuenta,kico nos ta papia, cu ken nos nos ta papia, y con nos ta expresa nos mes,e palabranan cu nos ta usa, pasobra papia sin tene cuenta, kico ta bon y kico ta malo, por herida otro hende y asina nos ta perde amistad.
Awendia tin un forma di broma y bisa cu ami ta un hende flat, mi ta bisa un hende algo flat den su cara, mi no ta beat around the bush, pero hopi biaha nos tin di tene cuenta, ora nos ta papia cu hende malo, y tene cuenta cu salud y edad, y hasta ora nos ta papia cu mucha nos tin di tene cuenta.
No ta asunto di ta mas sabi, ni tampoco di ta mas fuerte, no ta asunto cu bo tin rason, pero ta asunto di controla nos vocabulario, y asina no laga ningun palabra danino sali for di nos boca,pa laga nos palabra nan sali cu sabor pa edifica hende, pasobra hasta ora bo ta coregi un persona, bo por usa palabra cu ta pone madura, enbes di kibra e persona, door di bise cu e por mihor y cu e sigi haci su best, y Dios lo yude.
Si un un hende haci un fout of cay den un pica, no ta tempo di haci cherche, ni tampoco tira palabra, pero ta tempo pa restaura e persona, cu nos caracter manso, pasobra asina ey nos ta alcansa su curason.
Palabra di Dios ta bisa lo siguiente: Rumannan hasta si un hende wordo sorprendi den cualkier delito,boso cu ta spiritual, restora un hende asina , cada un wak su mes,pa boso no wordo tenta.( Galationan 6:1).
Ora nos ta papia of critica, y hasta tin hende ta husga, laga nos wak e palabra cu nos ta usa y no usa nos boca pa destrui, pasobra corda cu e mundo aki ta draai rond y tin un dicho ta bisa “ Awe por ta ami, mayan por ta abo, y no bisa ami si no, pero yama riba e misericordia di Dios, pasobra e palabra di Dios ta bisa claramente den Mateo 26:41 lo siguiente:
Keda vigila y haci oracion, pa boso no cay den tentacion, e spirito ta boluntario, ma e carni ta debil.
Mateo 26:41.
E vocabulario cu politiconan ta usa mundialmente contra otro, no ta un vocabulario cu por wordo usa ta den cas di famia, pasobra e ta wordo usa pa ventaha y crecemento politico, pero e vocabulario ey nos tin di tene bon cuenta cu e no po wordo usa den cas di famia, especialmente contra nos yuinan chiki cu ta lanta,pasobra cu palabra bo ta lanta un mucha y cu palabra bo ta kibra un mucha.
Mescos cu palabra bo ta stabilisa bo matrimonio, bo cas y bo famia, pero cu palabra malo, sushi, abusivo, cu ta perhudica y herida hende su curason, y asina bo ta debilita y trece desunion y division den bo propio cas.
Si un hende di afo manda un insulto, bo tin defensa den bo cas, pero si den cas mes insulto ta cay constant contra otro, ken lo por contene?
Proverbionan 13:3 ta para scirbi: Esun cu warda su boca ta preserva su bida,ma esun cu ta habri su boca hancho ta keda na ruina.
Proverbionan 21:23 ta bisa :Esun cu ta warda su boca y su lenga, ta warda su alma di angustia.
Proverbionan 18:21 Morto y bida ta den e poder di lenga, y esnan cu stima esaki lo come su fruta.
Laga insulto un banda.
Sinceramente, Pastor Marcel Balootje
