Lista di figuranan ilustre cu lo perde e di 23 Mundial den historia

Falta apenas 40 dia p’e inicio di e di 23 edicion di e Copa Mundial di Futbol na Ciudad di Mexico, y e lista di e gran ausentenan ta birando mas largo. Mientras algun strea ya a keda descarta oficialmente, otronan ta den un careda contra holoshi pa alcansa e soño mundialista.

Lesionnan grave di ligamento y fractura t’e causa principal cu varios hungado renombra lo no por fungi riba e tereno. Entre e ausentenan mas destaca tin e Brasileñonan Rodrygo y Éder Militão, e Argentino Juan Foyth, e Ingles Jack Grealish, e Aleman Serge Gnabry y e Frances Hugo Ekitike.

E hungadonan cu lo perde Mundial 2026

Rodrygo (Brasil): E delantero di Real Madrid a sufri un ruptura di ligamento crusa anterior y di munuscus den su rudia drechi dia 2 di maart. Consecuentemente, el a keda descarta pa hunga cu e “Canarinha”.

Éder Militão (Brasil): E defensa central a wordo opera na Finlandia pa un ruptura di tendon na su biceps femoral robes. Esaki ta un recaida cu lo ten’e pafo di accion entre cuater pa cinco luna.

Juan Foyth (Argentina): E campeon mundial y defensa di Villarreal a sufri un ruptura di e Achillespees robes na januari ultimo. Cu un recuperacion di ocho luna, Foyth ta keda oficialmente for di e cita mundialista.

Luis Malagón (Mexico): E portero di e seleccion Mexicano y Club América a sufri un lesion grave na su Achillespees na luna di maart. Despues di su operacion, lo e mester keda inactivo di seis pa ocho luna.

Hugo Ekitike (Francia): E punta di Liverpool a lesiona su Achillespees hungando den Champions League contra PSG. El a wordo opera na London y lo ta for di e tereno pa un periodo di 9 luna.

Serge Gnabry (Alemania): E hungado di Bayern München a confirma recientemente cu su soño mundialista a termina debi na un lesion den e aductor di su pian drechi. “Lamentabelmente esaki a caba pa mi,” Gnabry a declara.

Jack Grealish (Inglatera): E atacante a sufri un fractura di stress den su pia robes den luna di januari. Despues di su operacion na februari, el a perde e resto di e temporada y e participacion den Mundial.

Samu Omorodion Aghehowa (Spaña): E delantero hoben di Oporto a lesiona su ligamento cruza anterior na luna di februari. E tempo di recuperacion di shete pa ocho luna ta impedi su debut den e Mundial di Merca, Mexico y Canada.

Takumi Minamino (Hapon): E figura Hapones a sufri un ruptura di ligamento cruza na december 2025. E hungado di 31 aña tabata clave den e fase di clasificacion cu cuater gol anota.

Mohammed Salisu (Ghana): E defensa di Mónaco a sufri un lesion similar n’e ligamento cruza anterior na luna di januari, locual ta rekeri un recuperacion di te cu nuebe luna.

E hungadonan cu ta spera riba un milager

Cristian “Cuti” Romero (Argentina): E defensa di Tottenham ta un duda grandi p’e torneo tras di un ruptura di ligamento colateral den su rudia drechi sufri dia 13 di april. E tin un tempo di inactividad di seis pa ocho siman, locual ta nifica cu lo e yega cu masha poco ritmo di wega.

Estevão (Brasil): E hungado di Chelsea di apenas 19 aña a sufri un lesion den su isquiotibial dia 18 di april. Su participacion ta den duda serio debi n’e dolor fuerte cu el a presenta durante e cambio.

Lamine Yamal (Spaña): Un di e gran speransanan di Spaña a sufri un lesion den su biceps femoral. Si e plasonan wordo cumpli, tin hopi optimismo cu lo e por yega na tempo p’e Mundial.

Giorgian de Arrascaeta (Uruguay): E hungado di 31 aña a wordo opera di su clavicula drechi dia 30 di april tras di un caida den Copa Libertadores. Su recuperacion ta calcula na 45 dia, net na tempo p’e debut di Uruguay den Grupo H.

Mikel Merino (Spaña): E mediocampista di Arsenal a wordo opera pa un fractura di stress na februari. Aunke nan a calcula cuater luna di inactividad, e seleccion di Spaña tin speransa cu lo e por wordo inclui den e lista final.

Resumen di lesionnan clave: