Segun Premier Wever Croes, e documentonan di Hulanda a yega dialuna mainta. Hulanda a manda e concepto di Rijkswet Financieel Toezicht como tambe informacion riba e entidad cu lo mester bay atende cu e prestamo. Esaki ta un entidad cu lo bay presta placa na e gobiernonan di Aruba, Curacao y Sint Maarten. O sea lo no bay presta placa mas di Gobierno Hulandes, pero desde awor lo presta via e entidad aki. E entidad aki lo haya un tipo di rechtsvorm den forma di bestuursorgaan. E entidad aki tambe lo ta esun unda lo mester bay bati na su porta si mester di astistencia technico. Por ehempel si mester di personal Hulandes pa yuda Aruba, manera entre otro expertonan den traha ley, e ora ey e entidad aki lo regla pa Aruba haya e personal aki. E mes entidad aki lo ta encarga tambe cu inversionnan. E lo actua manera un sorto di Banco di inversion cu lo por yuda e paisnan desaroya nan economia.
E otro condicion ta e RFT, unda pais Aruba mester aproba pa asina drenta den e RFT cual e ora ey Aruba lo bay cay bao di CFT.
Kico ta loke Gobierno di Hulanda kier?
Gobierno di Hulanda kier pa prome cu dia 10 di juli, esta prome cu diabierna awor, pa Aruba bay di acuerdo cu tur e condicionnan. O sea, e entidad, e RFT y e 16 otro condicionnan riba e diferente otro areanan.
Premier Wever Croes a bisa cu loke ta lamentabel ta e hecho cu Hulanda no a pone algo riba papel cu asina Gobierno di Aruba por comparti cu comunidad. Esey ta un critica cu Wever Croes a lansa mesora cu a ricibi e documentonan. Motibo di esaki ta cu e documentonan aki ta riba e pakete cu ta bay conseho di reino diabierna awor. Locual cu ta bay Conseho di Reino ta secreto.
Wever Croes a bisa Hulanda, cu e kier tur e puntonan aki den un carta cu e por mustra comunidad ta kico Hulanda ta exigiendo.
Kico te consequencia pa Aruba?
Riba e preunta aki, Premier Wever Croes a keda debe un contesta, pasobra na e momento aki ta haciendo e analis ey. Pues, e documentonan a wordo haya y nan ta wordo analisa.
Segun Wever Croes, cu e forma di atende esaki door di Hulanda ta onbehoorlijk.
