Fraccion lider Evelyn Wever-Croes (MEP) a expresa awe den e reunion publico di Parlamento preocupacion serio tocante e manera cu reunionnan di Parlamento ta wordo convoca y continua.
Motibo pa esaki ta e reunion publico di 16 di juni 2026, cu a wordo yama a base di un peticion di fraccion MEP pa tende Minister di Finansas y Asuntonan Economico tocante ehecucion di Mocion 2. E mocion aki a wordo aproba unanimemente pa Parlamento dia 26 di februari 2026 y a pidi Gobierno, entre otro, pa presenta un plan concreto di accion con ta bay explora posibilidadnan petrolero pa Aruba.
Sinembargo, e reunion di 16 di juni a wordo suspendi despues di aproximadamente dies minuut debido na problemanan tecnico. Desde e momento ey, ningun fecha nobo a wordo anuncia pa continua cu e reunion.
Wever-Croes a señala cu mientras tanto el a pidi, por escrito, clarificacion na Presidente di Parlamento tocante e continuacion di e reunion suspendi y tocante e criterianan cu ta wordo usa pa convoca reunionnan. Te awe, no a ricibi ningun reaccion riba e carta.
Na mesun momento, fraccion di MEP a constata cu awe si a tuma luga un otro reunion publico, tambe riba peticion di Minister di Finansas y Asuntonan Economico.
Segun Wever-Croes, e forma di actua aki ta crea duda serio den transparencia, consistencia y igualdad di trato den e agenda di Parlamento.
“No por ta asina cu un reunion cu ta trata ehecucion di un mocion aproba unanimemente pa henter Parlamento ta wordo suspendi pa un periodo indefini, mientras cu otro reunionnan si ta sigui. Decisionnan parlamentario mester respet y Parlamento tin derecho di ricibi informacion na tempo tocante ehecucion di su decisionnan,” segun Wever-Croes.
Fraccion MEP ta enfatisa cu esaki no ta trata e contenido di e mocion mes, sino un principio parlamentario fundamental: e deber di Gobierno pa duna cuenta tocante ehecucion di decisionnan aproba unanimemente pa e representacion di pueblo. E hecho cu e presidente di parlamento no ta yama e reunion, ta trece duda serio riba imparcialidad di presidencia di parlamento.
