Dia 9 di februari partido MEP a celebra e 55 aniversario di existencia di e partido. El’a cuminsa manera un soño grandi di Betico Croes y un grupo di hende sabi, cu a kere den un Aruba cu por determina su propio destino. Un soño cu a cuminsa cu conviccion y sacrificio, y cu a cambia destino di nos pais pa semper.
Awe, 55 aña despues, nos por mira atras cu orguyo. MEP no ta solamente un partido politico. MEP ta un movimiento cu a pone Aruba prome, cu a defende nos identidad, nos autonomia y nos dignidad como pueblo.
Pa mi, ta un honor inmenso y un emocion profundo di por a sirbi como lider di MEP pa casi 15 aña. Como prome hende muhe den e posicion aki, y como prome Prome Minister hende muhe representando nos partido, mi a carga e responsabilidad cu humildad, fortaleza y un profundo sentido di deber.
Mi ta agradecido na tur nos miembronan, simpatisantenan y ciudadanonan cu a cana hunto cu nos den e trayecto aki. E confiansa cu boso a duna ta nos mayor motivacion pa sigui traha pa un Aruba mas fuerte, mas husto y mas uni.
MEP ta mas cu e ayera. MEP ta e awe y e mayan.
Nos ta sigui cu e mesun fe, e mesun determinacion y e mesun amor pa nos pais.
