Parlamentario di Aruba, Ing. Carlos Bermudez: Respet y trato husto pa empleado publico ta fundamental pa un gobierno fuerte

Parlamentario pa AVP, Ing. Carlos Bermudez, ta haci un yamada cla pa mas transparencia, accion y responsabilidad den servicio di Departamento di Recurso Humano (DRH), enfatizando cu respet pa empleado publico no ta un luho, sino un necesidad structural pa e bon funcionamento di gobierno.

Segun Bermudez, durante algun aña consecutivo nos ta tende mesun mensahe: mester trece profesionalnan bek cas, mester retene e profesionalnan cu nos tin actualmente den aparato gubernamental, y mester modernisa y fortalece servicio di DRH. Sinembargo, e realidad cu hopi profesional ta enfrenta ta distinto.

Durante un reunion publico, Bermudez a comparti su experiencia personal como director di un departamento. El a relata con durante shete (7) aña, bou gabinete Wever-Croes I y II, el a sigui tur proceso y conseho di DRH pa logra promocion pa tres profesional. Ora finalmente e conseho a keda cla, e conseho a keda mas cu seis (6) aña “ter controle” na DRH, sin solucion concreto.

“Esaki no ta un cuestion personal. Esaki ta un cuestion di sistema,” asina Bermudez a expresa.

El a reacciona tambe riba declaracion publica di oposicion (partido geel), rechazando firmemente insinuacion cu su intervencion tabata motiva pa interes personal of cu lo ta contra profesionalnan di DRH. “Mi ta condena fuertemente pseudo-profesionalnan cu ta uza posicion pa perhudica otro profesional,” Bermudez a declara.

Como ehempel concreto, el a menciona e caso di señor Tony Yearwood, un profesional cu, pa motibo di salud, no por a presenta na trabou y como consecuencia no a haya su promocion na januari 2019. Señor Yearwood finalmente a bay corte y gana su caso. Segun Bermudez, por a evita e situacion si a prevalece un trato humano y respetuoso.

Parlamentario Bermudez ta señala cu su caso y esun di señor Yearwood no ta incidente aisla. Tin hopi empleado publico y departamento cu ta sinti nan mes victima di trato inhusto y proceso innecesariamente tranca.

“Tin biaha ta duna di pensa cu e departamento cu mester yuda empleado, ta mas dispuesto pa complica proceso cu pa facilita solucion,” el a bisa.

Bermudez ta haci un yamada directo na minister encarga cu DRH pa tuma accion inmediato. El ta propone un revision amplio di tur caso pendiente, puntrando claramente:

• Kico tur tin pendiente na DRH?

• Kico tur tin tranca den diferente departamento?

Y pone huristanan y conseheronan di minister na trabou pa resolve asuntonan cu urgencia y transparencia.

E ta reconose cu tin hopi empleado di DRH cu ta cumpli cu nan deber cu profesionalismo, pero e pregunta legitimo ta:

“Kende ta haci cu algun caso ta keda tranca aña tras aña, mientras otro ta bai ‘smooth-smooth’? Nos cu nos? Friends and family?”

Bermudez ta enfatica cu no por laga pseudo-profesionalnan perhudica otro profesional. “Ta basta. Mester bin mehoracion real y sostenibel.”

E parlamentario ta conclui cu respet, transparencia y trato husto pa empleado publico ta base di un gobierno eficiente. “Ora profesionalnan ta sinti nan mes balora, e aparato gubernamental henter ta gana. Esaki ta pa e bon comun.”