Riba Dia Mundial di Turismo, lider di fraccion di MEP Evelyn Wever-Croes a haci un yamada pa un cambio di vision den e manera cu Aruba ta maneha y desaroya su sector turistico.
โNos no por nenga e importancia enorme di turismo pa Aruba,โ Wever-Croes a declara. โTurismo ta e motor di nos economia, ta crea empleo, ta genera entrada pa nos pais y ta crea espacio financiero pa inversion den educacion, infrastructura, bienestar y e futuro di nos comunidad.โ
Pero precisamente pasobra turismo ta asina importante pa Aruba, segun Wever-Croes, nos mester tin e curashi pa papia tambe riba e otro banda di e historia.
โAruba ta confronta e preocupacion di overtourismโ
E crecemento di e cantidad di bishitante ta pone cada bes mas presion riba e capacidad di Aruba. Esaki ta hopi visibel den trafico, infrastructura, cantidad di desperdicio, presion riba espacio publico y naturalesa y, eventualmente, tambe riba e calidad di bida di nos ciudadanonan.
Segun Wever-Croes, esaki ta trece un pregunta fundamental dilanti:
โNos kier mas turista, of nos kier mas balor pa Aruba?โ
Pa e lider di MEP, e contesta mester ta den un cambio di vision y un movemento mas fuerte den direccion di e modelo di โHigh Value, Low Impactโ, un decision cu a wordo tuma durante Gabinete Wever-Croes caba.โEsaki no ta nifica cu nos ta contra turismo. Al contrario. E ta nifica cu nos ta pro-turismo, pero pro un turismo cu ta sostenibel. Un turismo cu ta genera mas balor economico y social, mientras cu ta pone menos presion riba nos isla.โ Crecemento cu mester tin un limite responsable
Wever-Croes a recorda cu durante e periodo di gobierno di MEP a tuma varios paso den direccion di un turismo mas sostenibel, pasobra crecemento sin planificacion por eventualmente bira un problema pa Aruba, y awor nos por mira esey ta pasando.
โDesde Parlamento, nos lo sigui haci nos trabou: haci pregunta, controla, propone y vigila pa sigura cu crecemento economico no bira un excusa pa perde e balance cu Aruba mester.โ
E punto di salida, segun Wever-Croes, ta cu Aruba ta un isla cu tin espacio y recurso limita.
Aprecia turismo, cuida Aruba
Wever-Croes a haci uso di e ocasion pa gradici tur hende cu ta traha den e sector di turismo y cu tur dia ta contribui na e experiencia unico cu Aruba ta ofrece su bishitantenan.
โLaga nos sigui aprecia turismo. Laga nos sigui proteha turismo. Pero mas cu tur cos: laga nos proteha Aruba. High Value, Low Impact. Esey ta e direccion pa un turismo cu por sigui duna prosperidad, awe y pa generacionnan nos dilanti.โ
