“Mi ta felicita sra. Jeanette Richardson-Baars di CMMA y su equipo cu e di tres pelicula “Habri bo wowo”. Ta peliculanan cortico cu ta presenta con traficacion di hende ta tuma luga na Aruba. Lamentablemente nos tambe tin e problema aki na Aruba, y p’esey nos tur mester ta alerta pa bringa e problema aki” Lider di MEP y ex Prome Minister Evelyn Wever-Croes a bisa den un entrevista.
Durante Gabinete Wever-Croes 1 y 2 a pone prioridad na combati traficacion di hende, y desde Parlamento e fraccion di MEP ta sigui comprometi na e causa aki. Pa e fraccion ta hopi importante pa tur hende realisa cu e problema aki ta uno hopi serio na Aruba. Tambe pa tur hende conoce e señalnan pa detecta ora tin un caso di traficacion of abuso.
Y finalmente pa asina denuncia e casonan. “Mi ta purbando un tempo caba pa logra un reunion den Parlamento cu e team di profesionalnan di CMMA, den e comicion di husticia. E reunion ey no a wordo yama ainda. Mi lo pidi tambe un reunion den e comicion di enseñansa pa un reunion riba e tema aki. Na mi parecer ta hopi importante pa na scol caba nos siña nos hobennan reconoce e señalnan di traficacion di hende y a traves di Parlamento nos lo kier mira con por logra esaki. Aruba ta un ”one happy island”, y nos mester percura pa e ta asina pa tur hende cu ta biba aki. P’esey mi lo sigui sostene tur esfuerso di CMMA y nan partnernan, den esaki”, tabata palabranan di Evelyn Wever-Croes.
