E Aruba Vacation Ownership Longitudinal Report 2026 ta presenta vacation ownership como un di e fundeshinan di economia turistico di Aruba, pues mas cu simplemente otro segmento di acomodacion.
E estudio, encarga pa Aruba Timeshare Association (ATSA) y Aruba Tourism Authority (ATA) y prepara pa Universidad di Aruba, ta basa riba 1,481 encuesta completa colecta entre november 2025 y januari 2026. Esaki ta e di tres estudio comparabel, despues di investigacionnan haci na 2008 y 2017, locual ta permiti Aruba identifica cambionan a largo plazo den su mercado di vacation ownership.
Actualmente e sector ta consisti di aproximadamente 16 resort y 3,500 unidad, representando mas cu US$2 biyon den inversion di capital acumula, y un calculo di US$750 miyon anualmente den actividad economico directo pero tambe indirecto. E rapport ta argumenta cu su berdadero balor ta bay mas leu cu solamente acomodacion: propietarionan ta genera gastonan na restaurant, comercio, transportacion, recreacion, atraccionnan y otro negoshinan local, mientras cu nan bishitanan repetitivo ta brinda un demanda turistico excepcionalmente predecibel.
E caracteristica cu ta resalta mas ta lealtad. E edad promedio di un propietario ta 66.6 aña; 79.4% a bishita Aruba mas cu dies biaha, y 94.5% tin intencion di bolbe den dos aña. Un impresionante 95.5% lo recomenda Aruba na otro hende, mientras cu 87.1% ta indica cu nan ta masha of super satisfecho cu nan experiencia actual di vacantie.
Tambe, tabatin un cambio fundamental den e motibo pa cual hende ta posee timeshare na Aruba. E destinacion mes a bira mas importante cu e producto di ownership. 95.9% ta uza nan ownership pa vacantie personal, compara cu solamente 0.7% cu ta uza intercambio. Na 2008, uzo personal tabata 77.8% y uzo di intercambio 11.5%. Esaki ta demostra cu propietarionan cada biaha mas ta mira Aruba como nan destinacion di “cas”, en bes di simplemente un localidad conveniente dentro di un red internacional di intercambio.
Propietarionan tambe ta keda mas largo — un promedio di 13.7 anochi — y ta gasta considerablemente rib’e isla. Gasto promedio a yega aproximadamente US$2,100 pa persona, 48% mas halto cu na 2017. Restaurantnan ta e mayor beneficiario, sigui pa acomodacion, huur di auto, compras, wega di placa, supermercado y recreacion.
E advertencia principal di e rapport ta relaciona cu demografia. E base di propietarionan ta bira mas grandi di edad y ta hopi maduro, locual ta refleha un retencion excepcional, pero mescos ta crea e necesidad pa atrae generacionnan mas hoben. Na mesun momento, Aruba tin espacio limita pa expansion grandi di inventario. P’esey, futuro ta depende menos di traha mas unidad y mas di conserva calidad di e destinacion, fortalece lealtad, mehora sostenibilidad y seguridad, y crea productonan di ownership mas flexibel pa cumpradonan mas hoben.
Finalmente, e mensahe di e rapport ta cla: Aruba ta competi riba relacionnan, no riba volumen. E parti activo di mas grandi den vacation ownership no ta e cantidad di camber, e ta decadanan di conexion emocional entre propietarionan y nos isla. Proteccion di medio ambiente di Aruba, su limpiesa, seguridad, hospitalidad y calidad general. Esakinan ta esencial no solamente pa timeshare, sino tambe pa resiliencia y competitividad di economia turistico di Aruba
