Parlamentario Jennifer Arends-Reyes: Community Pool ta un inversion den salud, siguridad y futuro di nos muchanan

Parlamentario Jennifer Arends-Reyes ta enfatisa e importancia di mantene Community Pool na San Nicolas como un facilidad publico sigur, accesibel y bon cuida. Un piscina comunitario ta hopi mas cu un lugar pa recreacion: e ta un inversion directo den salud, prevencion, deporte y igualdad di oportunidad.

“Nos ta biba riba un isla rondona cu lama. P’esey, siña landa no mester wordo mira como un luho, sino como un habilidad esencial cu por salba bida. Cada mucha na Aruba, sin importa su situacion financiero ni e bario unda e ta biba, mester tin oportunidad pa siña landa den un ambiente controla y sigur,” Arends-Reyes a expresa.

Community Pool por cumpli un papel importante den programanan di natacion pa scolnan, entrenamento di clubnan deportivo, actividadnan pa adulto mayor y rehabilitacion fisico. E facilidad por ofrece tambe aqua fitness, programanan di salud y oportunidadnan recreativo pa famianan cu no tin acceso na un piscina priva.

Ademas, un facilidad asina por contribui na identificacion y desaroyo di talento deportivo. Aruba tin hobennan cu potencial pa representa nos isla den natacion, waterpolo y otro disciplinanan acuatico. Sinembargo, talento solamente por florece ora tin infraestructura adecua, entrenadornan capacita y suficiente oportunidad pa practica.

Arends-Reyes a subraya cu despues di a inverti mas cu mey miyon florin pa e pomp house nobo, Community Pool lo sigui wordo manteni y cu e renobacionnan di e cafetaria y gazebonan lo continua. Segun e parlamentario, Community Pool tin un balor special pa San Nicolas. Inversion den facilidadnan comunitario ta genera mas actividad positivo, fortalece cohesion social y duna hobennan un alternativa saludabel pa pasa nan tempo liber.

“Un comunidad fuerte ta cuminsa cu lugarnan unda hende por encontra otro, move, siña y crece. Community Pool ta precisamente uno di e lugarnan ey. Nos mester mira e facilidad aki como un inversion den prevencion, salud y futuro,” Jennifer Arends-Reyes a finalisa.

Cada mucha cu siña landa ta un mucha mas sigur. Cada hoben cu practica deporte ta un hoben cu haya oportunidad. Y cada facilidad publico bon manteni ta un señal cu nos ta inverti seriamente den bienestar y futuro di nos comunidad.