Pa medio di esaki Aruba Lions Club, cual Club otro aña lo celebra su di 80 aña di su existencia, ta bisa danki y ta gradeci e pueblo di San Nicolas y vecindario pa a acudi for di mainta trempan caba na e Feria di Salud na Colegio San Augustin y a haci e evenemento un éxito rotundo.
Un danki special ta bay na nos colaboradornan kende nan ta: Colegio San Augustin pa facilita e lugar, Xavier University cu nan equipo Medico, Verpleeger/sternan cu a controla, sucu, cholesterol, presion etc., Aruba Vision Center cu a controla e presion den wowo cu ta algo sumamente importante pa tene cuenta cu ne, Fundacion Smile Moble cu a controla, hasi limpieza y reparacion na dentadura nan falso, Fundacion ABO cu tabata presente pa promer biaha y cu a duna informacion y guia importante pa tene cuenta cu nos tripanan, Mary Joan Foundation cu nan equipo di 3 Doctor cu tabata presente pa hasi e examinacion di pechonan pa tanto hende homber y hende muher pa preveni cancer di pecho, FEPOH y QUOTA cu a guia y hasi e testnan pa oido, na Dr. G. Fun-A-Fat cu tabata duna informacion over di uso di remedi nan corectamente, con y kiko hasi ora mester tuma mas cu un of dos pilder pa un tratamento, LEO CLUB y tur nos Leonnan pa nan ayudo y sosten personal y moral pa cu e exito di nos di 2 edicion di Health Fair, San Nicolas.
Mester menciona cu tur instancia cu a colabora a haci esaki gratuitamente y pesey mes tur bishitante a haña tur servicio gratis. Tambe un danki pa esnan cu a yuda tras di cortina kendenan a set-up e lugar, a prepara tur cos di come y di bebe pa tur cu a acudi na e Feria di Salud. Aruba Lions Club ta sumamente contento y satisfecho cu por a atende mas di 130 persona durante e mainta di e Feria di Salud aki.
Tambe un gradicimento special na tur prensa scirbi, radial y televisa cu a contribui na e exito di e mainta aki y Aruba Lions Club ta conta ariba nan sosten y cooperacion pa e proximo actividadnan. Por ultimo Aruba Lions Club ta pidi e pueblo en general y en particular esun di Oranjestad y vecindario pa keda pendiente pa e siguiente Health Fair cu lo bay ta 13 di juni proximo. Mas detayes lo sigui despues.
“We Serve”
