Nos hubentud en general ta vulnerabel, pasobra e enemigo ta cana manera un leon cu ta grunja buscando ken e por devora.(1 Pedro 5:8).
Tin cosnan ta pasando bao di nos hubentud cu mester bira punto di oracion pa nos tur, pa Dios por interveni.
A lanta un spirito di suicidio bao di nos hubentud.
Mucha cu ta expresa na nan mayornan cu nan no tin gana di biba mas.
Hopi mayor ta controla nan yui constantemente bao di video call pa wak si e mucha ta bon.
Hopi mayor ta biba bao di stress y depresion pa e actitud rebelde y negativo di nan yiu.
Tin sistema nobo di sconde locual cu ta pasando, pensando cu asina nos ta evita cu mas hoben of persona lo cay den e trampa di suicidio.
Pero ta net ora nos sconde e berdad e scuridad diabolico ta hanja forsa pa aumenta, pasobra no tin hende cu ta desenmascara e situacion, y hende a hanja miedo di papia.
Haci hopi oracion, pasobra tin hobennan cu ta sigi cierto cosnan diabolico y destructivo riba internet y ta corta nan curpa, y esey no ta nada di sconde pero ta cos pa lanta oracion contra dje, pa Dios interveni y e cadena por wordo kibra.
Tin hopi malbado ta cana cu malesa di caya, entre otro AIDS y ta pega hobennan cu ta tene relacion sexual pa hanja cos, sea pa cumpra telefon, prenda, panja caro, y despues ta keda decepciona pasobra nan tin un malesa cu ta dificil pa cura, cual ta hasta perhudica nan futuro, e cosnan ey mester wordo treci dilanti den oracion.
No ta tempo di haci wega, pasobra e tempo trabahoso cu nos ta bibando aden ta ataca nos hubentud na prome lugar , pasobra nan ta e futuro di mayan.
E cos ta hopi mas serio cu nos ta kere, e falta di respet y desobediencia bao di nos hubentud ta hopi, pero hopi alarmente.
E uso di droga ta manera nan no ta comprende cu droga ta haci danjo y cu droga a mata hopi hende, y si nan sigi asina nan tambe lo ta next in line.
Nos tin di papia fuerte, pasobra e situacion di bida ta fuerte, di berdad cu diabel kier mata yiu di hende.
Hobennan cu ta cay bao di mal influencia, cu ta perde nan indentidad, ken nan ta berdadermente.
Hobennan cu no ta interesa pa bay scol, pa nan por ta bon prepara pa un trabao, nan ta kere nan por biba di e trabao di carwash of hala garoshi den supermarket.
Nos cantidad di embaraso hubenil tampoco ta mucho abao.
Hobennan ta corre scooter y brommer sin ningun clase di papel tampoco number.
Hobennan cu ta corre auto sin lus anochi, y cu un velocidad halto.
Pero tambe nos ta experiencia mayornan cu ta dunando nan yuinan mal ehempel di bida, door cu nan ta pone alcohol y droga na prome lugar y di mes e yuinan cu ta hoben ta sinja e maldad ey for di nan propio mayor. Imagina bo un mayor cu ta usa droga dilanti di su propio yuinan.
Nos mester haci tur nos esfuerso pa lanta nos yuinan den caminda di Dios, cual ta e unico caminda cu ta hiba na berdad y bida.
Si nos no uni y haci oracion awe, mayan cu Dios kier ta di lamenta, pasobra e enemigo no ta haci wega.
Un hoben mester tin un cas di Dios cu e ta bishita, pa asina e palabra di Dios por drenta su curason, y cambia su bida,pa semper.
Sinceramente, Pastor Marcel Balootje
