Prome Minister Mike Eman a participa na apertura oficial di e exposicion “Letra y Consenshi: Balor Humano di un Pueblo” na Biblioteca Nacional San Nicolas. E exposicion ta invita comunidad pa reflexiona riba historia di sclavitud na Aruba y e balor di dignidad humano, precisamente na bispo di Dia Nacional di Conmemoracion pa Abolicion di Sclavitud.
E ceremonia a cuminsa cu palabra di bonbini di Ichmarah Kock di Biblioteca Nacional Aruba, sigui pa un mensahe di directora Astrid Britten. Prome Minister Mike Eman a dirigi palabra na e presente, despues di cual e programa a continua cu un presentacion poetico di Tasho the Poet, un presentacion di Marushka Tromp tocante UNESCO Memory of the World, un mensahe graba di Memory of the World Nederland, un presentacion di Raymond Hernandez kende ta director di Archivo Nacional Aruba tocante e documentonan relaciona cu sclavitud, un dramatisacion artistico, palabra di Jefka Alberto cu a representa e Comite di Conmemoracion Pasado di Sclavitud y un introduccion oficial di e exposicion door di Renwick Heronimo.
Den su discurso, Prome Minister Eman a destaca cu ta importante pa comunidad mira e periodo di sclavitud, reconoce e hechonan cu a tuma luga y acepta cu tabatin un epoca den cual humanidad no tabata trata tur hende cu igualdad y dignidad.
El a señala cu solamente ora nos ta dispuesto pa reconoce e pasado, nos por sigui corigi loke a sosode y traha pa evita cu circunstancianan similar no ripiti nunca mas. Den e contexto ey, el a menciona tambe e disculpa oficial cu anteriormente a wordo expresa na nomber di Reino Hulandes y a indica cu cada generacion tin responsabilidad pa carga e balornan di respeto, igualdad y dignidad humano.
Prome Minister Eman tambe a comparti un reflexion personal tocante su propio historia familiar. Durante un bishita na Archivo Nacional Aruba, el a siña cu su tatarawelo Cornelis Eman a casa cu un señora Capriles, kende su tata tabata un mucha cu a nace for di un mama cu tabata sclavisa. Segun el, e descubrimento aki a mustra con hopi famia Arubiano ta carga diferente parti di e historia aki y con e pasado di Aruba ta comparti pa hopi generacion.
Durante su discurso, el a enfatisa cu e historia di sclavitud no ta solamente trata di pasado, sino tambe di e responsabilidad continuo pa proteha e balornan cu ta sostene nos sociedad. El a señala cu e conflictonan y e gueranan cu mundo ta enfrenta awe ta recorda con civilisacion ta fragil y con rapidamente humanidad por perde e balornan di respeto y dignidad si nan no ta wordo cuida.
Un di e documentonan central di e exposicion ta e asina yama “Carta Capriles”, un carta scirbi na 1857 door di Juan Bautista Capriles y otro ciudadano Arubiano, den cual nan a informa e Gezaghebber di e tempo tocante maltrato contra e personanan sclavisa. E documento ta mustra cu ainda prome cu emancipacion na 1863 tabatin e hendenan na Aruba cu a hisa nan bos pa defende dignidad humano.
E Carta Capriles ta forma parti di e coleccion di documentonan historico cu na 2025 a wordo inscribi den UNESCO su Registro Memoria di Mundo, reconociendo nan importancia pa patrimonio documental mundial.
Na final di su discurso, Prome Minister Eman a expresa su aprecio na Archivo Nacional Aruba, Biblioteca Nacional Aruba, UNESCO y tur e expertonan cu durante hopi aña a dedica nan mes na investiga, preserva y digitalisa e documentonan historico aki. El a destaca cu nan esfuerso ta sigura cu e historia di Aruba keda accesibel pa futuro generacion y cu conocemento ta un instrumento importante pa evita cu e paginanan scur di historia no ripiti nunca mas.
