Un otro punto di enfoke di Parlamentario Tromp-Lee durante e encuentro publico tabata e falta di cumplimento cu procesonan parlamentario y e falta di respet di parti di e minister concerni. E reunion, originalmente yama den comision pa dos siman pasa, a wordo posponi pa peticion di e minister mes, kende a alega di no tabatin documentacion prepará.
Tromp-Lee a expresa su decepcion cu despues di a concede e peticion di posponemento, e minister no a mantene comunicacion pa confirma si e reunion lo tuma luga diahuebs manera acorda. E parlamentario a purba di establece contacto sin exito, y a haya sa di e desaroyonan solamente via presidente di Parlamento. Tromp-Lee a subraya e importancia di respet mutuo y debido proceso den trabou parlamentario, specialmente ora topiconan di importancia nacional ta wordo trata. El a spera un miho coordinacion y comunicacion den futuro.
