E fayecimento di e pashent di 89 aña, Petronilia Tromp, a bira un bataya entre e dolor di un famia y e burocracia di Horacio Oduber Hospital (HOH). Ruthy Vrieswijk-Bergen, yiu di e difunto, a lansa un fuerte contesta publico den direccion di Raad van Bestuur di hospital, despues cu e institucion a declara su keho formal como “totalmente infunda”. Pa e famia, e contesta di hospital ta wordo cataloga como un pura construccion huridico pa sconde un falta grave di empatia, cuido y profesionallismo di e dokternan encarga.
E conflicto a cuminsa despues di e hospitalisacion di e pashent aña pasa pa un sospecho di obstruccion intestinal (ileus). Segun e famia, e pashent a drenta hospital sin problema pa guli, pero a wordo suta cu infuus di glucose y calmante, mientrastanto cu e heridanan na su curpa a salí mas grandi y profundo cu e forma cu el a drenta. E keho principal di Vrieswijk ta para firme riba e hecho cu e tabata presente henter dia na pia di cama ora e salud di su mama tabata bay atras, y ningun dokter a presenta pa duna cara ni atende e crisis.
E posicion oficial di HOH: Tur cos tabata corecto
Den un carta oficial firma pa e presidente di Raad van Bestuur, Drs. J.E.M. Vroegop, hospital ta duna di conoce cu e Klachtencommissie a evalua e caso y a conclui cu e keho ta infunda. Segun hospital, e zaalartsen (Dr. Tempel y Dr. Laclé) a cumpli formalmente cu nan debernan durante e oranan di nan respectivo turnonan di trabou. Hospital ta defende su mes bisando cu e cambionan di personal ta normal den un setting di cuido, y cu e pashent a ricibi e atencion a base di protocol.
E gran incoherencia: Bla bla bla y recomendacion
E decision aki a lanta un ola di indignacion y critica, no solamente for di e famia, sino tambe for di algun miembro di comunidad. Analisando e caso, tin un incoherencia hopi grandi den e defensa di HOH. Di un banda, hospital ta insisti cu e keho no tin fundamental, pero di otro banda, e Klachtencommissie mes ta lansa un lista largo di recomendacion severo pa e mesun Raad van Bestuur.
E comision ta exigi pa hospital train y instrui e personal inmediatamente pa garantisa un miho comunicacion, structura y envolvimento di famia, y maneha e situacionnan caminda tin un carga emocional halto. Pa e criticonan y e famia, esaki ta un prueba cla: si e protocolnan tabata asina perfecto, e comision lo no a haya e necesidad di pidi cambionan structural den e forma di traha di e personal.
David contra Goliat
E demantante ta categorisa e contesta di hospital como un pura wega di palabra pa laba man y proteha e institucion contra demandanan legal. “E bunita palabranan ey no ta yuda. Mi mama di 89 aña tabata un pashent cu mester a ricibi un cuido humano, y esey tabata e unico chens cu el a ricibi den su bida,” Ruthy Vrieswijk a expresa conmovi.
E famia a confirma cu nan no tin pensa di baha cabes dilanti di e “bolwerk poderoso” cu hospital ta representa. Cu e meta pa evita cu mas anciano wordo trata di un forma denigrante of neglisha, e famia ta exigi pa e directiva di hospital cuminsa actua como ser humano cu curason, y no como un kantoor friu preocupa unicamente pa su statuto y su escondite legal.
