E apertura di Aruba DOET 2026 e aña aki a tuma luga na e veld di futbol di Sero Patrishi. Su excelencia Gobernador sr. Alfonso Boekhoudt a haci e acto oficial di apertura den presencia di organisadonan di Aruba DOET, CEDE Aruba, docentenan y studiantenan di Universidad di Aruba, boluntarionan di Hotel St.Regis y Ritz Carlton, habitantenan di bario di Sero Patrishi, miembronan di prensa y demas invitadonan.
Durante e ceremonia di apertura, sra. Julie Wever, director di FCCA a hiba palabra y a enfoca cu ta un honor pa FCCA forma parti di e proyecto di Aruba DOET y cu apertura ta sosode na bario di Sero Patrishi, cu ta un di barionan di FCCA. “Locual ta haci e iniciativa aki asina bunita no ta solamente e proyectonan cu ta wordo realisa, pero e manera cu e boluntarionan ta haci esaki; “Hunto”. Aruba DOET ta mustra nos cu ora hende, organisacionnan y comunidadnan uni forsa, nos ta logra cosnan bunita y importante pa nos Pais Aruba.
E sentimento di traha hunto, di yuda otro y di contribui na algo mas grandi cu nos mes, ta locual ta duna proyekto aki su berdadero balor. Cu e iniciativa aki di Aruba DOET, FCCA ta contribui tambe na mehoracion di e “leefbaarheid” den nos barionan. “Leefbaarheid” den nos barionan, no ta solamente caminda, cas of edificio. Cu esaki nos ta referi na hende, e mucha, e adulto, e famia, cu ta forma parti di un bario. Un bario unda tur persona ta sinti nan mas sigur, scucha y involucra. Esaki ta un di e compromiso cu FCCA tin cu su barionan, pa crea un ambiente mas saludabel, positivo y sostenibel y fortalece e union social na bienestar di nos barionan. E aña aki a scohe e barionan di Sero Patrishi y Cunucu Abou.”
E director a continua bisando cu e proyecto Aruba DOET en colaboracion cu Universidad di Aruba y CEDE Aruba ta mustra nos cu impacto real ta posibel ora conocemento, compromiso social y accion practico bini hunto. Den e diferente proyectonan di bario, nos a mira cu participacion directo di studiantenan, hunto cu colaboracion di nos institutonan local ta trece cambio grandi den comunidad. Esaki ta demostra ora nos uni forsa -Hunto nos ta logra!- . Cu e colaboracion cu Universidad di Aruba y CEDE Aruba y Aruba DOET, nos por fortalece iniciativanan cu ta promove cohesion social den bario, educacion, y participacion di e ciudadano. Esey ta exactamente e tipo di sinergia cu nos mester, organisacionnan cu ta combina nan forsa y nan experiencia pa logra mas impacto den nos barionan.
Finalmente e director di FCCA a yama danki na Aruba DOET, Universidad di Aruba, CEDE Aruba, habitantenan di e barionan di Sero Patrishi y Cunucu Abou, y tur boluntario pa nan cooperacion pa haci e proyectonan di barionan di Sero Patrishi y Cunucu Abou un realidad.
