Durante e apertura di e Proyecto Aruba DOET, e director di FCCA, sra, Julie Wever y director di Cede Aruba, sr. Daniel Tecklenborg a firma un acuerdo entre FCCA y Cede Aruba. E acuerdo aki ta encera pa structuralmente duna mas atencion na e barionan di FCCA. Alabes pa yuda e habitantenan activo di e barionan, implementa nan mesun ideanan y proyectonan.
Sra. Julie Wever a enfatisa cu esaki ta un paso importante, pasobra e lo permiti identifica necesidadnan di e residente mas rapido y crea solucionnan hunto cu e comunidad mes. Cu e colaboracion aki entre FCCA cu CEDE Aruba, nos ta habri un capitulo nobo importante. CEDE Aruba conoce e necesidadnan den nos barionan y lo bay traha hunto cu FCCA na bienestar di nos barionan.
FCCA ta kere firmemente cu e forsa di Aruba ta den su capacidad pa traha hunto. Ningun institucion su so por haci e trabounan aki. Pero conhuntamente nos por crea barionan unda calidad di bida ta central.
E director a termina bisando cu laga e colaboracion aki sigui inspira nos pa sigui construi un Aruba unda tur hende ta conta.
FIN
