Directie Ouderenzaken (DOZ) conhuntamente cu Departamento di Agricultura, Cria y Pesca (Santa Rosa) ta organisa un Fiesta di Cunucu pa nos Grandinan.
E evento aki ta wordo organisa den cuadra di un acuerdo di cooperacion cu a wordo firma aña pasa entre DOZ y Santa Rosa. E acuerdo aki tin como meta principal pa stimula participacion activo di adultonan mayor pa medio di organisa actividadnan enfoca riba cultivo local y sostenibel, cria y pesca.
E Fiesta di Cunucu pa nos Grandinan lo tuma lugar diadomingo 28 di juni 2026 pa 9’or di mainta te cu 2’or di atardi na Santa Rosa (Piedra Plat 114-A). Durante e evento aki lo tin bendemento di cuminda crioyo, cos dushi, obra di man y arte, fruta y berdura, mata y mucho mas!
Durante e evento aki nos lo tin musica di Kibrahacha Boys, grupo di baile “Young at heart”, Gucci Dancers y nos lo finaliza e evento cu e banda musical Enkura. Tambe Santa Rosa lo duna un reconocemento na 5 persona cu pa hopi aña a duna un gran aporte na e sector primario di Aruba.
Tambe lo tin un competencia di cuminda crioyo pa promove nos cultura y nos alimentonan local. Un grupo di experto lo fungi como hurado y lo scoge e plato crioyo ganador.
Diferente grupo di adultonan mayor cu ta organisa actividadnan social y recreativo lo ta presente na e Fiesta di Cunucu pa bende cuminda, cos dushi, obra di man y mucho mas. Di e forma aki nan por recauda fondo pa por haci mas actividad pa adultonan mayor.
Bin forma parti di e celebracion di Dia di San Juan, contribui na gruponan social pa adulto mayor y demas bendedornan cu lo tey presente durante e dia aki y yuda promove nos cultura!
