Awe mainta, Corte di Husticia a sigui cu tratamento di e caso Flamingo, caminda a sigui cu e caso penal contra Gilberto Tiel.
SOLO DI PUEBLO por a compronde cu Fiscal a exigi 1 aña di prison pa Tiel. Fiscal ta haya Tiel culpabel di a cumpra Otmar Oduber y di a malversa Gobierno placa door di tabata un empleado fantasma.
Aña pasa a pospone e caso caminda Hues a instrui Ministerio Publico a manda yama Tiel, cu ta bibando na Merca. Ministerio Publico a manda Tiel citacion pero e no a presenta den Corte. Esey ta haci cu Hues a sigui cu tratamento di e caso sin cu Tiel tabata presente.
CUMPRA OTMAR Y MALVERSA GOBIERNO
Na November 2024, Ministerio Publico a presenta e acusacion di 3 empleado fantasma o sea nan tabata wordo paga pero realmente nan no ta den servicio di Gobierno. Esaki ta wordo considera malversacion di placa di Gobierno. Ta trata aki di Gilberto Tiel, Laurence Phillips y Hans Geerman, kendenan ta wordo acusa di a gana placa di Gobierno sin cu tabata realmente den servicio di Gobierno entre Januari 2018 y Juni 2020.
Hues a mustra cu Tiel tabata den un caso dia 23 December 2020 y Hues a declara no admisibel cu Tiel tabata den servicio di Gobierno. Segun e sentencia, Tiel tabata un patronahe politico y no tabatin un trabao den Gobierno, ganando mas cu 4 mil florin. Hues a mustra cu Corte ta haya cu no tabatin un acuerdo di trabao real y a declara Tiel no admisibel.
Hues a mustra tambe cu Tiel lo tabata traha pa e compania di yiu di Otmar, Jeandrick den su tempo liber. Otmar a bisa cu el a haci asina cu 5 otro trahador, pa nan por haci otro trabao. Jeandrick a bisa Hues cu Tiel tabata traha cun’e den bar pasobra Tiel tin hopi conocemento. El a bisa cu Tiel tabata gana a base di comision.
Hues a mustra cu a interoga Jeandrick y a scucha combersacionnan y Landsrecherche ta conclui cu Tiel tabata den servicio di Jeandrick. Hues a mustra cu Tiel a wordo interoga na Hues Comisario caminda el a bisa cu e tabata traha pa Jeandrick y tabata haya comision.
FISCAL A EXIGI 1 AÑA DI PRISON
Un di e dos Fiscalnan a hiba palabra y a bisa cu Tiel a cumpra Oduber y tabata un ambtenaar fantasma. Fiscal a bisa cu Marisol Tromp a haci denuncia di ambtenaar fantasma. Fiscal ta haya legalmente proba cu Tiel ta un trahador fantasma.
 | ReplyForwardAdd reaction |
